TUALCHHUNG CHANCHIN THAR

Vawiin Assembly session-ah  MNF member, Pu Lalrinawma resolution, “MLPC Act kan hman mek hian Kohhran, khawtlang, chhungkua leh mimalah harsatna leh buaina nasa tak min thlen avangin he dan hi titawpin MLTP Act kan hman thin ang kha hman leh ni rawh se” tih  chu vote laa hnawl a ni. He resolution buknaah hian eptu member-ten pawm an remtih laiin a tam zawk, rorel lai pawl member-te chuan pawm an remti lo a ni. Resolution sawihonaah hian member 19-in thu an sawi a, eptu lamah chuan Resolution neitu, Pu Lalrinawma  bakah mi dangte chuan MLPC Act hmanga zu zawrh chhuah chu kum 2 a  tling ta a, khawtlang, chhungkua leh mimalah buaina leh harsatna nasa tak a thlen avangin titawpa, zu khap tlatna dan, MLTP Act hman leh chu Mizoram mamawh niin an sawi a, kawtkai maia zu lei tur a awm chuan a lei leh in an pung a, a nghawng tha lo pawh a pung zel tih te, naupang sikul kal lai thlengin an lei theiin an in thei tihte sawi chhuakin, nakin hnu lam  thlenga Mizoram awm chhoh zel dan tur ngaihtuahin Zu khap tlatna dan hi hman leh mai tha zawk niin an sawi a, Zu zawrh hian sualna chi hrang hrang, mipat hmeichhiatna lam leh pawi khawihna dang tam tak a hrin chhuah bakah HIV/AIDS pawh a tipung niin an sawi. Zu zawrh phalna pek a nih hnuah mi tam tak an thi tawh nia sawiin, an zinga tam tak chu tun hnai kum 2 kal ta vel atanga zu zawrh in niin an sawi bawk a ni.  Rorel lai pawl member-te erawh chuan tuna khuahkhirh chunga zu zawrhna dan hman mek, MLPC Act hmanin a nghawng thil tha leh tha lo zir chiang turin sorkarin Study Group a din tawh tih sawiin an report, kumin kum tawpa thehluh tur chu lo ngaichang turin eptu member-te chu an ngen a, zu hi thil tha lo a nih avangin khawvel ram hrang hrang, tuna ram changkang tak tak ni ta, US-te thleng pawhin tun hma lam khan an lo khap tawh a, hlih leh a nih hnuah an khap nawn tawh lo nia sawiin, khawvel awm chhung chuan zu hi a awm dawn tih te, Pathianin khawvelah sual awm a phal a, ringtute chu sual laka fihlim tura inla hrang tur an ni zawk tih te sawiin mahni inthununna neih tum chu mihring tan thil pawimawh ber niin an sawi. Tun hma lama kum 17 chhung, zu khap tlat a nih lai pawh khan Aizawl khawpui chhehvelah zu a tam thute, Police leh Excise lamin zu zawrh ruk tam tak tak an man thu te, zu ngawlvei leh zu avanga thi an awm reng thute pawh an sawi a, member thenkhat chuan Zoram hmun dang zawnga MLTP Act hman lai leh MLPC Act hman laiin chhim lama Autonomous Disrict Council 3 huam chhungah heng dan 2-te hi hman a ni ve lova, an buaipui lo bawk niin an sawi a, he resolution hi eptu MNF member in a put luh chu kum 2018-a Assembly inthlanna neih tur thlira Polictics a hamthatna hmuh tumna niin an sawi a ni. He sawihonaah hian House leader, Pu Lal Thanhawla chuan khawvela hnam mawl ber pawhin zu hi an buaipui lova, Mizote hi zu buaipui lo hnam kan nih a tul a, tunah chuan a in an rui a, a in lo pawh an rui bawk a, ruih reng reng hi thil tha a ni lo tih sawiin    tunah hian sorkar-in a tha ber tur a zawng mek a, chu chu nghah rih a tul niin a sawi.  
———–

Mizorama zu zawrh tihtawp phutin MNF thalaite chu vawiin chawhma khan Assembly House bulah an pung khawm a, an pun khawm lai hian Budget Session neih mekah Tuikum bialtu MLA, Pu Lalrinawma Private Resolution, MLPC Act kan hman mek hian kohhran, khawtlang, chhungkua leh mimalah harsatna leh buaina nasa tak min thlen avangin he dan hi titawpin, MLTP Act kan hman thin ang kha hman leh ni rawh se tih sawi ho a ni a, hei hi House-in a pass ngei theih nan leh an thlawpzia entir nan House bulah hian an pung khawm a ni. MNF thalai President chuan, Mizoram sorkarin zu a zawrh avangin nunna chan tam tak an awm tawh tih a sawi a, zu ngawl vei thar pawh an pun phah hle nia sawiin, Supreme Court thupekah National Highway leh State Highway atanga meter 500 aia hnaiah zu dawr a awm tur a ni lo tih ni mah se, tuna zu dawr thenkhat chuan hei hi a zawm lo hle niin a sawi a, Mizoram sorkar chu a rang lama zu zawrh titawp tura an phut thu sawiin zu zawrh an tum lai khan Kohhran hrang hrangte an rawn lo niin a sawi bawk. MNF thalai pungkhawmte hian zu duh lohna leh zawrh duh lohna poster an tar bakah an au rual a, mipui nun tichhetu, zu zawrh an duh loh thu te, zu zawrh tihtawp an phut thu leh, mihring nun aia zu chhiah it-a  sorkar puhna thute hmangin an au rual a ni. Hemi hnu hian buaina chhuak lovin MNF thalaite hi an tin darh a ni.
————

CM, Pu Lal Thanhawla’n Champhai leh Zokhawthar inkar kawngpui, kilometre 27-a thui siam mekah Contractor-in hna a thawh that loh avangin a senso tumtu, World Bank a lawm vak lo tih Assembly a hrilh. MNF member, Pu Lalruatkima zawhna leh zawh belhna dangte a chhannaah PWD enkawltu, CM, Pu Lal Thanhawla chuan, he kawngpui siam mek hi kumin January thla khan World Bank hian a endik a, Contractor chu hna thawk tha vak lova a hriat avangin state sorkar thlengin a rawn nawr phah niin a sawi a. National Highway siam tur reng reng, a Contract amount a san avangin Mizoram dinhmun pawh hre lo, phai lama Contractor lian zawkten hniam te tein an chhang thin a, a taka hna an thawh dawnin harsatna an tawk leh thin si a, hei hian nasa takin hnathawh a tihmuan phah thin niin a sawi. Champhai leh Zokhawthar inkar kawngpui hi sorkar laipui pawhin a ngai pawimawh hle tih sawiin Pu Lal Thanhawla chuan, Myanmar nena inlaichinna tihthat a ngaih avangin kawngpui hi Falam leh Tahan thleng siam tum a ni a, he hnathawh hian ngaih pawimawh lehzual a hlawh theih nan tunah hian External Affairs Ministry-ah Myanmar leh Mizoram inkara Bus service-tir tura nawr mek a ni tih a sawi.  CM-in Assembly a hrilh danin, Champhai leh Zokhawthar inkar kawngpui hi World Bank – International Development Association (IDA) atanga puk, cheng vbc. 153 leh nuai 10 hmangin kum 2014 December ni 26 atang khan siam tan a ni a, a thawk tur hian Navi Mumbai-a TARMAT Limited thlan a ni. Nakkum June ni 26-a thawh zawh tura ruahman a ni a, tunah hian hna hi zaa 42 thawh zawh tawh a ni a, pawisa hi zaa 37.10 pek a ni tawh a ni.
—————–

Mizorama boruak alh thei leh tuialhthei zawn mekah hnathawktu Company atangin an thlen chin, sorkarin a la dawng lo tih Geology and Mineral Resources Minister, Pu H. Rohluna’n Opposition Group Leader Pu Vanlalzawma zawhna chhangin a sawi a. An report hi sorkarin la dawng lo mah se, an hnathawh dan hi uluk taka vil reng a nih avangin an thlen chin chu Department-in a hre chiang a, hmar lama hnathawktu, ONGC Ltd.-in Kolasib District-a Meidum leh Zanlawn-ah lei an verh tawh a, Zanlawn-ah hian an hlawhchham rih a, Meidum-ah chuan Gas hmuh a ni a, Central Block-a hnathawktu OIL India Limited-in Maubuang leh Keifangah lei hi an verh tawh a, heng hmunahte hian an beisei ang an la hmuh rih lo nia sawiin, tunah hian ONGC Ltd. hian Suarhliap-ah lei hi verh that leh an tum mek a, uluk zawka zir chian a, thlawhtheihna hmanga enfiah mek a ni a. Hemi atan hian Suarhliapah pawh khawtlang an inrawn khawm mek tih a sawi. Pu H. Rohluna chuan, tunah hian ONGC leh OIL India chu an Agreement anga an term a tawp rih avangin sorkar laipuiah pawh sei dil mek a ni tih a sawi a, hei hi phalsak an nih chuan Oil leh Gas hi zawn chhunzawm a, hmu ngei tura tan lak mek niin a sawi.

CM, Pu Lal Thanhawla pawhin, Mizorama Oil leh Gas zawn mek chu uluk zawka ngaihven turin MP pahnih pawh hriattir an ni tih a sawi a, hetih rual hian hnathawktute hian an thlen chin hi Mizoram sorkar an hrilh tha duh vak lova, a bikin ONGC phei chu Tripura-ah hna an thawh mek bawk avangin Mizorama Oil leh Gas chu Tripura lam atanga lak chhuah an tum em tih thlenga zawh an ni a, he thil hi Mizoram tana thil tangkai a nih avangin sorkarin theihtawp a chhuah tih a sawi a ni.
————

LAD Minister, Pu PC Lalthanliana’n mimal enkawl Picnic Spot atanga chhiah lakna tur dan thar duan mek a ni tih MNF member Dr. K. Beichhua zawhna chhangin Assembly a hrilh a. Tunah hi chuan a khuahkhirhna tur dan a la awm loh avangin chhiah lak theih a ni lova, tunah hian CM Office tanga thuchhuak angin Swimming Pool Control and Regulation Act, 2016 siam tum mek a ni tih a sawi. Mizoramah intihhlimna hmun tha a awm loh avangin sorkar chuan nawm chenna tur ni lovin chen nawmna atan hmun hrang hrangah Park a siam a, Aizawl District chhungah Lengpuiah Brig T. Sailova Park te, Hmuifangah Lal Thanhawla Park te, Hlimenah Lalsavunga Park leh Muthi Park-te siam a ni a. Lunglei District-ah pawh Pukpuiah Laldenga Park leh Lunglei District Park siam a ni a, Serchhipah Dawngzawl Park leh Kolasib District-ah Thingdawl park siam a ni a, heng Park hrang hrang hi mipuiten an chhawr tangkai mek niin a sawi. Pu PC Lalthanliana chuan, veng hrang hranga vantlang inthiarna hmun chu a hranpa-in LAD-in a enkawl lo nia sawiin, a awmna veng VC leh tlawmngai pawlte enkawl tura ngaih a ni tih a sawi. Melthum daia vantlang inthiarna chu tun hmain LAD kutah a awm thin a, tunah chuan UD&PA kuta hlan chhawn a nih tawh thu leh uluk zawka enkawl ni thei se a duh thu, Minister chuan a sawi a ni.
————–

Vawiina Mizoram Assembly Session chu MNF Member Pu Lalrinawma resolution sawihova buk a nih hnu, vawiin chawhnu dar 4:36 khan inkhawm kaihruaitu, Speaker Pu Hiphei chuan thawhtannia chhunzawm leh turin a titawp. Tawhtannia session chhunzawm leh a nih hun chuan hun hmasa darkar khat chhung chu zawhna leh chhanna atan hman a ni ang a, hemi hnu hian Minister pahnih – Pu R Lalzirliana leh Pu PC Lalthanliana-te hna chanpual, nakkum sorkar kum chhunga enkawlna tur sum ruahman sawihova pass tum a ni ang.
——–

National Commission for Women Member, Pi Rekha Sharma-i’n tualchhung rorelna, Local Body-ah hmeichhiate tan seat zaa 50 hauh chu a duh dan niin thuthar la khawmtute a hrilh a. State dangte nena khaikhinin Mizo khawtlang nunah hmeichhiate dinhmun chu tha deuh mah se, hmasawnna tur tam tak a la awm nia a hriat thu a sawi. Mizorama lo zin mek, Pi Rekha Sharma chuan, tun thla ni 21-a Aizawl a lo thlen hnuah Central Jail, Protective Home, Women Study Centre, Aizawl Police Station-a Women’s Cell, Mizoram University leh hmun dang pawimawh a tlawh kual tawh thu sawiin, Police hotute a kawmnaah Central Jail dinhmun an hriatpui lo lutuk chu mak a tih thu a sawi a. Jail chu inhremna hmun ni lovin, insiamthatna hmun, Reform Centre a ni tih hriat a ngai a, hetiang a nih laia Central Jail-ah zirna leh Skill Development Centre siam a ni lo leh an damloh nikhuaa an inenkawlna tur damdawi takngial pawh pek a ni lo chu tha lo a tih thu a sawi. Pi Rekha Sharma chuan, Mizoram Police zingah hmeichhia zaa  3 chauh an awm chu thil tha lo tak nia a hriat thu leh, hei hian thubuai chhui kawngah harsatna a thlen palh a hlauhthawn thu a sawi a, hmeichhe Police hi lak hnuhnung ber chu kum 2008-a mi daih tawh a nih avangin lak belh thuai ni thei se a duh thu a sawi bawk. Zawhna chhangin National Commission for Women Member chuan, State dangte nena khaikhin-in Mizo khawtlang nuna hmeichhiate dinhmun chu tha deuh mah se, kawng tam takah hmasawn tulna lai a la awm nia a hriat thu a sawi a, thingtlang lamah hmeichhiate chunga hleilenna a la tam a, naupang venhimna dan, Protection of Children From Sexual Offences (POCSO) Act hnuaiah kum tin thubuai ziah luh a pung chho zel leh he dan hnuaia vanduaina tawkte endik tura hmeichhe Doctor an awm lote chu thil tha lo tak nia a hriat thu a sawi a. Hetih rual hian state danga thil thleng zing tak, hmeichhiate Acid-a beihna Mizorama a thleng ve ngai lo chu chhuanawm a tih thu a sawi a ni. Pi Rekha Sharma-i’n thuthar lakhawmtute a hrilh danin, kum 2015 chhung khan Mizoramah POCSO Act hnuaiah thubuai 71 ziah luh a ni a, nikum 2016 chhung khan 103, kuminah hian thubuai 19 ziah luh a ni tawh a ni.
————

Mizoram Merchants Association (MIMA) Gen. Hqrs Executive leh MIMA Affiliated Member Association aiawhte thu khawm chuan, Bawngkawna LRM building-a Vishal Mega Mart  hawn tum an duh lohna lantir nan, naktuk chawhma dar 10 atangin LRM building road kawtah Sitting Demonstration neih an rel a, Vishal Mega Mart hi Mizo hnam ralna leh sum leh paia inchimralna thlenna tur nia sawiin,  hawn loh ni se an duh thu an sawi a, an Sitting Demonstration hi a sawt loh chuan dodal chhunzawm zel an tum thu an sawi bawk. Mi thenkhatten WhatsApp leh Facebook-ah Vishal thlawp zawngin thu an theh darh nia sawiin, hetiang thu hi theh darh ni tawh lo se an duh thu an sawi a, hetiang thu theh darh hi Mizo hnam pawi khawihna niin an sawi bawk. Vishal Mega Mart bungrua tur hi an hawn hma pawhin a lo thleng tawh niin MIMA thu khawm chuan an
sawi a, sorkar lam pawh in chhui chiang se an duh thu an sawi a ni.
————

Mara Students Organisation-in Aizawla Mara zirlai, mipa leh hmeichhe hostel sak chhunzawm phutna atana nimin atanga tiam chin awm lo-a Mara House, Zotlanga lut leh chhuak turte an dan chu, MADC hruaitute nen an inbiak rem tak avangin nizan atang khan an titawp. Puan tawh angin MSO hian MADC hruaitute lakah hian thil phut tam tak an nei a, nizan khan MADC EM, Pu K. Chhuabei leh MSO hruaitute hi an inbia a,  MADC hruaitute chuan MSO thil phut zawng zawng hi an pawmsak vek avang leh, vawiin atanga Hostel pawh sak chhunzawm a nih dawn avangin, lungawi lohna an lantir hi an titawp ta a ni.
—————-

Mizoram CSS Hindi Teachers Association-in sorkara an thil phut nawra CM Office bula tiam chin awm lova chaw an nghei chu an chhunzawm zel a, hemi avanga chau, damdawi in panpui 20 chuang an awm tawh. An pawl hruaitute chuan, CM, Pu Lal Thanhawla’n Assembly House-a a thusawiah CSS Hindi Teacher-ten sorkar an nawr dan chu nalh lo, kawhmawh bawl leh kuangte hial daha a puhna chu chhangin, sorkar an nawr danah nalh lo tak leh kawhmawh bawla an awm an hriat loh thu an sawi a, kuang an dah chhan chu an member thi tawhte sunna leh hriat reng nan leh an thil tihah hlawhchham an tum lohzia leh a tul a nih chuan a tawp thlenga beih an tum tih lantirna niin an sawi a, CM in a puh dan chu na an tih thu an sawi a ni. CSS hnuaia Hindi zirtirtute chuan, anmahni ang bawka harsatna tawk, Nagaland-a CSS Hindi Teacher-ten sorkarah kawhmawh an bawl ve lo nia CM-in a sawi pawh chhangin, Nagaland-a mite hian sorkar nawrin Secretariat Main Gate an tichhe hial a, Gate pahnihna an tihchhiat leh hmain sorkarin a inrempui ta zawk niin an sawi a,  sorkar chu anmahni ngaihtuah lo-ah an ngai lo nia sawiin, sorkar laipui kaihhruaina anga anmahni lak ngheh tumna a awm em tih chu an zawhna a nih thu leh, a awm lo a nih chuan ruahman thuai tura an phut thu an sawi. Sorkarin CSS Hindi Teacher atana a lak, mi 1,305 zingah mi 18 an boral tawh chunga tuna mi 1,297 an la ni thei chu eng dan hmangin nge post ruak awmte hi hnawh khah a nih tih chu an zawhna a nih thu sawiin,  kum 2013 September ni 30-a CSS Hindi Teacher-te inkhawmpuia khatih laia School Education Minister, Pu Lalsawta thusawi chungchanga Pu Lalruatkima zawhna, Pu Lalsawta chhanna-a, Ukil a nih thu leh sawi chin tawk a hriat thu leh intiamna a nih loh thua a chhang chu an pawm loh thu leh mak an tih thu sawiin, intiamnaa an ngaih tlat thu an sawi bawk. Sorkar nawra chaw ngheite hi nizan khan Civil Hospital-a Doctor leh nurse-ten an tlawh a, chau zual deuhte chu damdawi an pek bakah thisen chaw an khai a,  vawiin chawhnu pawh khan medical team hian an tlawh leh a, damdawi in panpui zinga a chau zualte hi admit duh mah se, khum a awm loh avangin admit lovin CM Office bulah an letpui leh niin an sawi. Chawhnu khan an thian thi tawhte sunna hun tawi an hman hnuah kuang an dah chu an la sawn niin CSS Hindi Teachers Association hruaitute chuan an sawi bawk.

Mizoram Middle School Hindi Teachers Association chuan CSS Hindi Teacher-ten dah ngheh phuta sorkar an nawr chu tunah sorkar tan harsa mah se, school engemawzatah Hindi zirtirtu neih loh avanga harsatna tawk an awm erawh chu pawi an tih thu an sawi a, hemi avang hian CSS Hindi Teacher-te chu sorkarin a theih dan anga chhawr dan zui dan ngaihtuah se an duh thu an sawi.
—————

Vawiin khan khawvel pumah Tuberculosis (TB) Day chu, ‘TB titawp turin i tangrual ang u’ tih thupuia hmangin hman a ni a. Health Minister, Pu Lal Thanzara hova Chanmari YMA Hall-a inkhawm buatsaihah Minister chuan, tunah chuan Revised National TB Control Programme chu State AIDS Control Society, National Tobacco Control Programme leh Non Communicable Disease te nen an thawk ho mek a ni, a ti a. HIV veite thihpui tam ber chu TB a ni tih hriain TB leh HIV vei kawpte chu ART centre atangin HIV damdawi bakah TB damdawi pek chhuah tel thin an ni tih a sawi bakah Health Care Provider Surveillance a hawng nghal bawk. World TB Day puala inkhawm hi Health Services Director, Dr. F. Lallianhlira’n a kaihruai a. State TB Officer, Dr. Vanlalfela sawi danin, India ramah nikum chhung khan mi nuai khat zelah mi 217 in TB an vei a, Mizoramah TB vei 2,149 an awm a, za-a 11.70 chu HIV+ vei tel an ni. Mizoramah Microscope hmanga TB natna hrik en theihna hmun 35 a awm a. TB natna vei hi hriat chhuah a nih phawt chuan sokarah Report ngei ngei tur a nih thu a sawi bawk. He inkhawmah hian Health  Secretary Pu Lalrinliana Fanai leh Principal Director, Dr. K. Ropari pawhin thu a sawi a. Zuangtui, Chhinga Veng leh Rangvamual Sub Centre-te chhu TB enkawlna lama hnathawk tha zual chawimawina hlan an ni.
———–

Commerce and Industry Department hnuaia Bamboo Development Agency leh National Institute of Design tangkawp chuan nimin leh vawiin khan Edenthar Bamboo Handicraft Cluster-ah leh Chite Bamboo Handicraft Cluster-ah te mau atanga thil chi hrang hrang mawi tak a siam dan hna thawktute an zirtir. Bamboo Development Agency ngenna anga National Institute of Design atanga Mizoram tlawha lo zinte hi mi 3 an ni a,  Mau atanga thil chi hrang hrang, hralh tla tur leh mawi tura chei dan an zirtir a ni. Heng mite hian naktukah Vairengte-ah Vairengte-a Bamboo  Handicraft Cluster-a thawkte an zirtir leh ang.
————-

Union Home Ministry duh dan angin chhiat rupna a thlen thulha thil tih dan tur, Mock Drill chu vawiin khan Government J. Thankima College, Bawngkawnah buatsaih leh a ni a, DM&R Department leh department dang hotuten thil pawimawhte an zirtir a ni. Mock Drill neihnaah hian lirnghing leh kangmei avanga chhiatna laka inchhanchhuah dan leh hliam tuarte enkawl zui dan entir a ni a, chhanchhuahna hmanrua an neih angte an pho lang bawk. Mock drill-ah hian lirnghing avanga hliamte chu College Search and Rescue team, State Disaster Response Force, Sport and Youth Services Adventure Wing leh Mizoram Home Guards-ten an buaipui a, College First Aid Team leh Health Dept-a Doctor leh Nurse-ten an enkawl a, kangmei chhuak chu College Fire Safety team leh Fire and Emergency Services Team-in an thelh bawk.
——–

CHILDLINE Centre for Peace and Development-in vawiin khan I&PR Auditorium-ah damdawi hman sualna lakna naupang ven him dan tur zirhona a buatsaih a, District Child Protection Officer, Pu James Lalthangmawia’n a kaihruai a, Pu Samuel Lalzarlawma leh SCERT Child Protection Cell-a Lecturer, Pi V. Vanlalruati’n thil pawimawh hrang hrang an zirtir a ni. He zirhonaah hian tlawmngai pawl hrang hrang, kohhran leh khawtlanga mi thahnemngaite an tel a, sawihona hun hman a ni bawk.
————

Tun hnaia Mizoram atanga sipai tur lak thar mi 149-te chu vawiin khan Zemabawka Army Recruiting Centre-ah thlah an ni. Heng mite hi Army Recruiting Director, Col. Manish Natu chuan fuihin, sipaia an tlinna chhan chu anmahni theihna leh thiamna avang liau liau a nih avangin, an thiamna leh theihna te chu ram tan tha taka hmang turin a fuih a, sipaia tang tur mi 4,000 chuang intlar zinga a tha thlan chhuah an ni tih a sawi bawk. Heng mite hi General Duty, Tradesman, Clerk leh Nursing Assistant atana lak an ni a, an training-na tur hmunte hi Shillong, Lucknow, Varanasi, Hyderabad, Secunderabad, Nagpur, Jabalpur, Nasik, Bangalore leh Shimla te a ni.
———

Mizote Kutpui ber, Chapchar Kût chu nimin khan Tahan Mizo Welfare Organisation buatsaihin Tahan Field-ah hman a ni a. A hmanpuitu Myanmar MP, Pi Khawtinsiami chuan, zofate inunauna leh inpumkhatna chu a ngheh zual deuh deuh theih nan Zofaten Kut hrang hrang an neih chu hman vek tha a tih thu a sawi a, mipui tana rawngbawl tur thlan a nih avangin kut hrang hrang chu a hmang thei lo mai zawk niin a sawi. Tahan Mizo Welfare Organisation President, Pu Lalthangliana pawhin, Chapchar Kut hmanpui tura Mizoram atanga kal, Central leh MZP hruaitute chungah lawmthu a sawi a. Myanmar-a tuilian tuarte tanpuina atana Central YMA hnathawhah lawmthu a sawi bawk. Nimina Tahan-a Chapchar Kut hmannah hian Tahan leh a chhehvela khaw hrang hrang atangin Zo hnahthlak thahnem tak an tel a, Cheraw bakah Hnam lam leh zai chi hrang hrang entir a ni. Tahan-a Chapchar Kut hmanna hi Central YMA Asst. Secy, Pu R Lalngheta, Fin. Secy, Pu Lalrochuanga Pachuau leh CEC member pahnih, MZP President Pu Lalsangzuala Ngente leh  NESO council member, Pu Peter Chhangte-in an hmanpui a. Champhai leh Mizoram hmun hrang hrang atangin mi engemawzatin an hmanpui bawk.
————

India chuan khawvel ram dang 177-te rualin naktukah Earth Hour a hmang dawn a, hemi pual hian Mizoram sorkar hnuaia Power and Electricity Department chuan naktuk zan dar 8:30 atanga dar 9:30 thleng, Mizoram pumah kawlphetha pek a titawp dawn. Hei hi sik leh sa danglam zel venna a nih dawn bakah renewable energy pawimawhzia mipuite hriattirna a ni dawn bawk a, mipuite chu an mamawh loh pindana eng chhi lo tur leh tul lova hmanna pumpelh turin an chah bawk a ni.
——-

Vawiin khan Aizawl-ah khaw lum lai berin Celsius Degree 31.3 a ni a, a vawh lai berin Celsius Degree 10.3 a ni.
———

Naktuk, Inrinni-ah chuan, khaw lum lai berin Celsius Degree 27 vel, a vawh ber laiin Celsius Degree 15 vel a nih rin a ni. Zing dar 5:19-ah ni a chhuak ang a, tlai dar 5:32-ah a tla leh ang.
———

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken