TUALCHHUNG CHANCHIN THAR

Kumina Remna ni Celebration Organising Committee Chairman, Pu Lalbiakzuala’n naktipa remna ni champhaphak vawi 30-na hmang turin inbuatsaih peih fel thawkhat a ni tawh tih vawiin khan Aizawl Press Club-ah thuthar la khawmtute a hrilh a. Remna hi hlu hle mah se, Political party-ten inchirhtheh nan an hmang lek lek thin nia sawiin, kum 30 dawn lai chu sorkar, Political party leh pawl dangten anmahni remchan dan anga he ni hi an lawm mai thin avangin, mipui thinlungah a huhova hman duhna a lo piang chho a, nikuma Bairabi-a YMA General Conference-ah khan, ‘Remna ni hi mipui nawlpuiin, a huhova lungrual taka hman a nih theih nan sorkar-ah thlen ni rawh rawh se’ tih rel a nih hnuah, CM hnenah bawhzui a ni a, sorkar bulk tuma remna ni lawm chu Political party leh pawl thenkhatin an duh loh avangin April ni 21 khan Political party hrang hrangte kawmin, YMA kaihhruaina hnuaia a huhova hman turin ruahman a ni ta tih a sawi. YMA CEC chuan District-ah chuan he ni lawmna hi Sub-Hqrs. YMA in kengkawh se, Lawngtlaiah Central YLA, Siaha-ah chuan MTP Gen. Hqrs. te phungbawm atan sawm ni se a ti niin a sawi bawk. Pu Lalbiakzuala chuan, remna ni chu Party inchirhthehna atana hman atan chuan a uiawm nia sawiin, remna vanga hmasawnna lo awmte mipuiten an hriat a, remna hlutzia hi thangthar zawkte thinlunga tuh chu an thil tum ber niin a sawi bawk. Zawhna chhangin Pu Lalbiakzuala chuan, kum dang zelah Reman Ni chu YMA bul tuma hman chhunzawm a nih dawn leh dawn loh a sawi mai thei loh tih a sawi a. Hetih rual hian kumina Remna Ni hman tur chu a hlawhtlin viau chuan, hman zel pawh a beiseiawm niin a sawi bawk. He ni-a khuallian atana beisei, PM, Narendra Modi chu May thla khan sawmna an thawn tawh nia sawiin,  CM, Pu Lal Thanhawla pawhin tawngkaa a sawm bakah ziakin sawmna a thawn a. MNF President, Pu Zoramthanga leh  State BJP President, Prof. JV Hluna pawhin an sawm nia sawiin, hetiang khawpa an sawm nasa chunga chhanna an hmu lo chu vanduaithlak a tih thu sawiin, Mizo mipuite hi PM hian a lo ralkhat en hle em ni tih zawhna a awm thei hial niin a sawi.

Remna ni Celebration Organising Committee Secretary, Pu Lalhmachhuana sawi danin, Remna ni lawmna hi Mizoram pumah a rualin chawhma dar 10:30-ah tan tur a ni a. A hmanna pui ber, Aizawlah chuan, Larsap, Lt. Gen. Nirbhay Sharma chu khuallian a ni ang a, CM, Pu Lal Thanhawla chu khualzahawm a ni ang. Mizoram hmun 38-ah he ni hi a ruala lawm a ni ang a. YMA Branch awmna apiangah zing dar 8-ah remna ni puala Ramhlun North Branch YMA-in ‘Ro min rel sak ang che’ tih an sak chu YMA Information Centre atangin a ruala tihchhuah a ni ang.
———-

MNF party thuneitu sang, National Executive Committee, an President, Pu Zoramthanga hova vawiina Vanapa Hall-a thu khawm chuan, an party-in thuneihna a chan leh chuan mipui hmakhaw ngaia zu zawrh khap an rel. He thut khawmnaah hian resolution pass-in, ram pumah Indian National Congress chu thuneihna chang rei ber a ni chungin India ram chu mi rethei tamna ramah a chhuah avangin ram mipuiin an hnawl mek niin an sawi a, hmarchhak bial atanga Congress party nuai bo a nih theih nana North East Democratic Alliance din mekah MNF party pawh tel tura sawm an nih angin he pawl hawnna, July ni 13-a Guwahati-a neih turah tel ve ni se an ti bawk. Hengte bakah hian MNF inkaihhruaina dan ding lai ennawntu tur, Drafting Committee din pawh remtih a ni a, Congress sorkarin mipui ni tin mamawh hrang hrang a pe tha nia sawiin, pawi an tih thu te, Buhfai kudam hrang hrang ruak thawm hriat tur awm reng te, ration card siam dik theih loh te, ei rawngbawlna Gas tihchingpen hriat tur awm rengte avang hian a mawhphurtu,  Supply Minister chu a hna a hlen zo lo-a an ngaih thu leh Minister ni zui tlaka an ngaih loh thu te, sorkar-in Myanmar ram atanga vawk a lak luh avangin vawk natna hriin Mizoram District 5 a tuam chhuak nia an ngaih thu leh, hemi avanga chhungkaw tam tak an mangan laia ngawih chuh tlatah sorkar chu an ngaih thu te, AH&Vety Minister-in Myanmar atanga vawk note chawk luh a tihtawp duh loh avanga harsatna a thleng mek nia an ngaih thu leh an dem thu te, he hri leng avanga vawk chánte chu zangnadawmna pe ngei tura sorkar an phut thute an sawi bakah, MNF leh India sorkarin inremna an neih atanga kum tina an lawm thin, Remna ni chu kuminah Central YMA bul tuma lawm a ni tur chu lawmawm an tih thute pawh MNF party thuneitu sang, National Executive Committee thu khawm chuan an sawi bawk.
—————

Lai Autonomous District Council-a CEM Political Adviser ni lai, Pu Hmunhre Chinzah chu vawiin chawhma dar 10 khan chuap leh thin cancer avangin Lunglei Civil Hospital-ah a thi a, kum 84 mi a ni. Pu Hmunhre hian a nupui, Pu Zungtheni, an fate 9 leh a tute a kalsan a ni. A ruang hi vawiin khan Lunglei atangin Lawngtlai Council venga an chenna In panpui a ni a, naktuk chawhma dar 11-ah vui a ni ang. A vuina inkhawmah hian Assembly Speaker, Pu Hiphei, AH&Vety Minister,  Pu C Ngunlianchunga, Mara Autonomous District Council CEM, Pu RT Zachono, Mara District Congress President, Pu S Hiato, Parl. Secretary, Pu H Zothangliana leh mi pawimawh dangte an tel dawn nia thu dawn a ni. Lai Autonomous District Council CEM, Pu VL Hmuaka chuan Pu Hmunhre Chinzah chu Lai fate hamthatna atan leh hmasawnna atana theihtawp chhuaha hnathawk thin, mi inpe zo leh taima, a thih ni thlenga dinhmun pawimawh tak chelh a ni tih sawiin, hun lo taka a thi chu ram leh mipuite tan chànna nasa tak niin a sawi. Pu Hmunhre Chinzah hi kum 1938, December ni 24 khan tuna Myanmar ni ta, Thau khua-ah a piang a, India ramin zalenna a neih hnuah India ram khua leh tui nihna neiin, dinhmun pawimawh tak tak a chelh a, kum 2010-a LADC inthlanpuiah khan Congress ticket-in Lawngtlai-III bialah thlan tlin a ni a, a term tawp thlengin LADC Planning Board Vice Chairman a ni. Nikuma inthlan LADC inthlan zawhah khan Chief Executive Member Political Adviser atan ruat a ni a, a hun tawp thlengin a thawk a ni. Pu Hmunhrea hi lehkha thiam, mi thil thlir zau leh tawn hriat ngah tak a nih avangin Zoram chhim lama Autonomous District Council pathum, Lai, Chakma leh Mara Autonomous District Council ten Mizoram sorkar kal tlang lova sorkar laipui atanga sum hmuh dan an zawnnaah pawh Chairman a ni a, hmarchhak biala Autonomous District Council-ten dinhmun sang zawk leh tha zawka siam an phut avanga Sixth Schedule siam tha tura sorkar laipui an dawrnaah pawh Convenor niin sulsutu berah a tang a ni. Thla hluia New Delhi-a zina an thil phut bawhzuinaah pawh hruaitu a ni a, Aizawl-a a lo kir hnuah insawiselna a neih avangin enfiah a ni a, chuap leh thin cancer a ni tih hriat chhuah a nih hnuah enkawl dan dang a awm tawh lo tih hriat a nih avangin a faten Helicopter-in Lunglei-ah an la phei a, Lunglei Civil Hospital-ah enkawl a nih laiin vawiin khan a boral ta a ni.
————–

Vawiin khan Food, Civil Supplies & Consumer Affairs Department Secretary, Dr. Franklin Laltinkhuma hovin Assembly Secretariat Conference Hall-ah Mizorama ei rawngbawlna Gas leh motor hman chi tuialhthei sem dan leh a kaihhnawih hrang hrangte sawiho a ni. He sawihona-ah hian sorkar Dept. hrang hrang aiawhte leh Local Council Association, Central YMA, MCU leh Gas Distributors Association hruaitute an tel a, hmun hrang hranga LPG siam danglam leh khawih chingpen awm thin chu a lo ziaawm theih nana tan lak dan tur te, LPG Consumer-te zinga cash subsidy dawng tha lo engemawzat la awmten fel zawka an dawn theih dan tur ngaihtuah leh, khua leh veng zawng zawngah rualkhai taka LPG sem a nih theih nana thil tih dan turte sawiho a ni a. Diesel leh Petrol, black market-a hralh leh pawlh dala khawih chingpen a la nih fo chungchangah, a khuahkhirhtute indaih tawk lo mah se, awmze nei zawk tura hnathawh theih dan tur sawiho a ni bawk. He sawihonaah hian
ngun taka an sawiho hnuah, tun hnaia Gas khawih chingpen awm chu tihreh a nih nan resolution an pass a, veng tina gas semnaah gas bur hi buk vek a ni tawh ang a, a bùk tling lo chu a distributor-ten an la kir leh ang a, Company-ah an thawn let leh tur a ni. An thawn letna lehkha copy hi Supply Department hnenah an pe ang a, a bùk tling lo chu mipuite hnenah sem theih a ni lo vang. Gas distributor-ten a phurtute hnen atanga gas an dawnin uluk takin an bùk ang. Danin a phut anga India ram hmun danga an tih dan angin Advance Booking leh a dangte hi Pilot Project angin veng pakhatah en chhin ni se tih pawh ngaihtuah a ni a, LPG chungchanga dan ding laia a lan dan chuan, Gas bur phurh hi bottling plant atanga distributor-te kudam inkar zawng chu a phurtute mawhphurhna a ni a.  Distributor-ten a phurtute hnen atanga Gas bur an dawn fel hmain a buk tlin leh tlin loh leh a him dam em tihte uluk takin an enfiah tur a ni a. Dan ang chuan za-a 10 tal an check tur a ni a. An dawn fel hnu chuan buk tling lo emaw, him dam lo emaw a awm pawhin Distributor-te mawh a ni tawh a ni.
————

Kumina Higher & Technical Course zir tur thlanna turah Chakma-te chu Category II-a dah an nih avanga lungawi lohna, PIL, Gauhati High Court-a thehluh chu Court-in a ngaihtuah hnuah leh, Higher & Technical Education Department pawhin he dan thar hi hnuh kir leh a remtih thu, Court a lo hriattir chu tun thleng hian tihhlawhtlin a la ni lo niin Chakma Students Union chuan an sawi a, hei hi ram danpuia Scheduled Tribe Order 1950 bawhchhiatna leh Chakma-te en hranna niin an sawi a. Mizoram sorkar chu he dan thar siam hi sut tur leh, Chakma te chu Category I-a dah turin sorkar an phut a ni. Chakma Students Union chuan Chakma-te chu Category II-a dah chunga tun thla ni 21-a Higher & Technical Course zir tur thlan tawhna chu sut tur leh, Category I-a dah an nih hnua Technical Course zir tur thlang tha leh turin sorkar chu an ngen a, hei hi hlawhtlin loh chuan sorkar-in thupek a zawm lo tih Court chu hriattir an tum thu pawh Chief Secretary leh Higher & Technial Education Secretary an hriattir a ni. Hemi chungchangah hian vawiin khan MZP hruaitute chuan Higher & Technical Education Minister, Pu R Romawia an hmu a, hemi hnu hian kan Corr. zawhna chhangin Minister chuan hetiang hi Chakma zirlaite duh dan leh thil phut a nih si chuan Higher & Technical Course zir turte thlanna dan chu siam that leh a ngai dawn niin a sawi a, Education Secretary a zin bo avangin rang taka thil tih a harsa dawn niin a sawi bawk.
————–

Vawiin khan ZNP leh MPC Thalaiten Joint Meeting-a an thu lo rel tawh bawhzuiin Aizawl khawpui chhunga ILP fel fai lo leh nei lo an endik a, permit nei lo leh fel fai lo, hnam dang mi engemaw zat manin Police kutah an hlan a ni. Party pahnih thalaite chuan Zofate himna atana inhumhalhna dan tha tak a awm chunga bawhchhiat a ni reng mai chu tha lo an tih thu sawiin, a ken kawh kawnga chak leh zuala tan la tura sorkar an phut thu an sawi a, Zofate himna derthawng thei thil reng reng chu en liam an tum loh thu leh, thil dik leh tha-ah chuan a tul ang zela sorkar thawhpui pawh an inhuam thu an sawi a ni.
———-

Tukin dar 6 vel khan Republic Hmar veng, Holy Heart School bula kawngchhak lungrem chimin Taxi a delh a, vanneihthlak takin thi leh hliam an awm lo. Republic veng khawtlang hruaitute hnen atanga thu dawn danin, helai hmun hi tun hmain a lo min tawh a, leimin venna atan lung hi rem a ni a, tukin khan ruah a sur nasat avanga lei chein lungrem hi a tichim a. Lungrem hian a hnuaia Taxi MZ 01-E 7506, Republic venghluna Pu Sinaithanga ta chu a delh a, Taxi hi a chhe nual a ni.
—————

Vawiin khan Mizoram Apex Handloom & Handicrafts Cooperative Society (MAHCO) chuan I&PR Auditorium-ah Annual General Assembly an nei a, Cooperative Societies Registrar, Pu Sangdingliana leh State Level Cooperative Federation Chairman panga-in an hmanpui. He General Assembly hawnna inkhawm hi MAHCO Chairman, Pu Zohmangaiha’n a kaihruai a, Registrar Pu Saidingliana chuan, 2014-15 chhung khan MAHCO-in cheng nuai 1 leh a chanve vel a hlep a, kum 2015-16 chhunga cheng nuai 28 chuang laian hlep thei chu an fakawm hle a ni, a ti a. Treasury Square-a Hotel Rajj building chhawng 11, MAHCO-in an neih theih nana MAHCO hotute leh APEX Bank Chairman, Pi T.Lalmuanpuii thahnemngaihna pawh fakawm a tih thu a sawi. MAHCO hnuaiah Handloom Cooperative Society 83 an awm a, MAHCO hnuaia thawk chu mi 14 an ni a. Central sorkar atangin Block Level Handloom Cluster atan fund dil a ni a, hemi hmang hian nikum May ni 2 khan Handloom Training Centre hawn a ni. Kum kal ta chhung khan MAHCO hian District hrang hrangah Handloom Exhibition vawi 7 a buatsaih bakah Mizoram pum huapin Special Handloom Expo pawh hlawhtling takin a buatsaih bawk.
————–

Saiha leh Lawngtlai District-a leilung ngheh lohna leh chhiatna thlen theihna hmun nia hriat en chianna, District Hazard Risk Vulnerability Analysis chu vawiin chawhnu khan Disaster Management and Rehabilitation Minister, Pu C Ngunlianchunga’n a Pisa-ah a tlangzarh a, he report hi a nih dan tur ang taka hman a nih tur thu a sawi. He report hi Administrative Training Institute-a Disaster Management Cell Head Faculty, Dr. Lalrokima Chenkual-in Remote Sensing leh Geographic Information System Technology hmanga a buatsaih a ni a,  Saiha leh Lawngtlai District chhunga khuarel chhiatna thleng theite, a tuar theitu turte leh a lo thlen thulha lo hmachhawn dan turte tarlan a ni. He inkhawmah hian Mara Autonomous District Council-a Executive Member, Pu K Hrahmo leh Lai Autonomous District Council-a Executive Member, Pu Laltlawmlova Chinzah te pawhin thu an sawi a,  Aizawl District tan pawh hetiang lehkhabu hi buatsaih a lo ni tawh a ni.
—————

Vawiin khan Aijal Club-ah Mizoram State Sports Council General Body an thu khawm a, MSSC President, Pu Zodintluanga’n kaihruaiin, Association-te an chak chuan pawlah hmasawnna a awm a, pawl a chak phawt chuan infiamna lamah Zofaten hma an sawn zel dawn niin a sawi. MSSC Secretary, Pu C. Laltlanthanga’n an hnathawh a report a, 2016 – 2017 chhunga thil tih tur, Body Building Association hming thlak chungchang leh MSSC office-a hnathawh dan siam that chungchangte an sawi ho a ni.
———–

Cable TV Digitization chungchanga Aizawl District-a Nodal Officer, Addl. DC Pu Lalhmunsanga Hnamte hova vawiina Cable TV Digitization chungchang ngaihtuahtute chuan kumin July ni 31-ah Analog Signal titawpa Digital signal chauh pek chhuah an remti. Hei hian Cable TV Digitization Phase III huam chin, Aizawl khawpui, Lengpui, Sairang, Darlawn leh Saitual te a huam dawn a ni. He sawihonaah hian Cable TV Digitization Phase IV-in a huam, Mizoram puma Cable TV Operator-te chu kumin December thla tawpa inpeih fel hman turin an ngen a, vawiina thut khawmnaah hian Aizawl-a Multi System Operator pahnih LPS leh ZONET bakah Local Cable TV Operator te, Aizawl Postmaster leh a kaihhnawih sorkar Officer dangte an tel a ni.
————

Champhai District-a Govt. Khuangleng High School Headmaster leh Science leh Mathematics zirtirtute chu nimin khan an hna atanga chawlh lailawktir an ni. Heng mite suspend-na Order hi nimin khan School Education Directorate-in a tichhuak a, an hna atanga chawlh lailawktir an nih chhan hi zu rui chunga hna an thawh thin vang nia sawi a ni a, a hmuna thil awm dan enfiah a nih hnuah suspend-na thupek hi chhuah a ni ta a ni.
————-

India leh Korea inkara inlaichinna tha zawk a awm theih nana tan lakna kal zelah naktuk zan dar 6 atangin Korea-a K-Pop Band, IMFACT-in Mualpuia R. Dengthuama Hall-ah Concert an buatsaih dawn. Korean Cultural Centre, India Director Pu Kim Kum-Pyoung chuan, vawiin khan Aizawl Press Club-ah thuthar lakhawmtute kawmin, an thil tih hi a hrilhfiah a. Nikuma K-Pop Festival Contest, 2015 hlawhtling taka buatsaih a nih tawh avangin Concert hi an buatsaih leh dawn niin a sawi. Concert hi Korean Cultural Centre, India, Mizoram Tourism leh Post Event Management Incorporated tangkawp buatsaih a ni.
———–

Vawiin khan Aizawl-ah khaw lum lai berin Celsius Degree 29.5 a ni a, a vawh lai berin Celsius Degree 14.6 a ni. Nimin tlai atanga vawiin thlenga ruah sur kha mm 55.4 a ni.
————

Naktuk, Nilaini-ah chuan khaw lum lai berin Celsius Degree 29 vel, a vawh ber laiin Celsius Degree 15 vel a nih rin a ni. Zing dar 4:32-ah ni a chhuak ang a, tlai dar 6:07-ah a tla leh ang.
———

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken