TUALCHHUNG CHANCHIN THAR

Zoram Exodus Movement-in Mizoram tha zawk duhtu apiang thawkho tura inzirtirna Movement a pian theih nana thawh an tum thu an puang. Vawiin khan Aizawl Press Club-ah he thu hi sawiin, Zoram Exodus Movement puipate chuan, Mizoramah  sorkar tha a pian theih nan, chumi duhtute thawhhona tur huang a awm phawt tul an tih thu sawiin, chumi inzirtirna beihpui thlakna tur Movement siam phawt chu bul tan dan tur nia an ngaih thu an sawi a, hemi atana thawhna hming hi Zoram Exodus Movement tih vuah a ni a, Exodus Movement-in a tum ber chu ram leh hnam hmasawnna din tura sorkar tha siam a ni tih an sawi. He Movement pian chhuah dan ngaihtuah tur hian Steering Committee din phawt a ni a, Steering Committee puipa atan hian Rev. Dr. K. Thanzauva, Pu K. Sapdanga, Pu F. Rodingliana, Pu B. Lalchhanzova leh Dr. Vanlalthlana chu mawhphur lailawk tura ruat an nih thu an sawi. He Movement hi Mizo nun zia nena inmil zawnga kalpui tum a nih avangin a uap-tu tur, Val upa pawh an inruat tawh niin an sawi a, Val Upa chan chang tur hian Pu F. Lalremsiama, Pu Lalfak Zuala, Pu Bualhranga, Pu Lalliansawta, Pu JH Pahlira leh Rev. Dr. K. Thanzauva sawm an nih thu an sawi bawk. Zawhna chhangin ZEM puipa-te chuan, Non Congress emaw, Non MNF emaw an rilruah a awm rih lo niin an sawi a, Mizoram tha zawk duhtu apiang,  thawk ho tura inzirtirna Movement a pian theih nana thawh chu an tum ber a nih thu te, thu tawp erawh chu sawi ho leh tur a nih thu an sawi. Tunah hi chuan ruahmanna siam sa an neih loh thu leh, he movement atan hian a thu-a tui tlan phawt a pawimawh hmasa ber nia an ngaih thu an sawi a, tuna Political party awmte chu an do ngawt lo tih sawiin, pawl emaw, party emaw, mimal emaw, sawm leh hnualsuat an la neih loh thu sawiin, an movement tuipuitute chu an pawm vek theih thu an sawi a, anmahni zawmtute erawh chuan an kalphung an zawm ve a ngaih tur thu an sawi bawk. ZEM puipa-te chuan, party emaw pawl emaw,  thawhpui tumna pawh an la neih loh thu te, nakkum Assembly inthlanpui lo awm turah pawh candidate neih tha an tih thute  sawiin, sorkar tha a pian theihna tura inthlan hmachhawn dan kawng an ngaihtuah dawn niin an sawi a ni.     
———-

Mizorama kawng pawimawh berte zinga mi, Aizawl-Thenzawl-Lunglei World Bank kawng chu nizan dar 9 rik hma hret khan Thiak khaw bula Horticulture farm zâwnah lei min nasa takin a hnawh ping. PWD hotute hnen atanga thu dawn danin, he kawng pinna lai hi Horticulture farm ‘Centre of Excellence’ zâwnah a ni a, kawng chhak lam atanga lei tawlhin kawng a hnawh pin hi meter 200 vel zeta thui a ni a, he lei min hian a thlang lama Horticulture farm chhunga hnathawktute awmna in pawh a hnawl bung hmawk a, hei hian hemi hmuna transformer pawh a tichhia a ni. Lunglei khaw mi, bike-a kal pawh he lei min hian a hnawl a, amaherawhchu, vanneihthlak takin bike-a chuang chu a tlanchhiat theih avangin a him a, a bike erawh chu chhe nasa vak lovin tukinah khan lei min hnuai atangin lak chhuah a ni. He kawng hnawh pingtu lei tawlh hi vawiin atang khan a sir tawn tawn atangin JCB-in haiin, lei vung hi a paih a, amaherawhchu, kawng thlang lam chu Horticulture farm a nih avang leh mimal ram a awm avangin lei vung hi nawr liam mai theih a ni lova, tipper-a phura hmun danga paih zel a ngaih avangin he kawng hawn leh theih hun tur hi a sawi theih rih loh niin PWD hotute chuan an sawi. Thiak khaw Branch YMA hruaitute chuan lei min hi a thui avang leh lei vung paih tur a tam avangin a then fai chhung hian chawlhkar hnih lai a awh thei dawn nia an rin thu an sawi.

Aizawl-Tuirial-Seling-Chhingchhip kawng pawh lirthei chi tin kal theiha siam tlang tawh niin PWD hotute chuan an sawi a, Tuirial bula tun hnaia hmun hniha lei tlahniam hnawh khah lehna hmunah leh Chhingchhip Mualpuia kawng chhuat bal laia thir lei, bailey bridge-a tlan luhna laia lei chhùn chu a nàl deuh avangin kal tlang a harsa niin an sawi a, heng lai hmunah hian kawng nal loh nan lung phah a la ni dawn a ni. Lunglei atanga Lawngtlai panna kawng chhuat bal hêlna kawng siamah pawh tluang takin motor a kal thei niin PWD hotute chuan an sawi. Aizawl-Champhai kawng, Tuirini bula lei minin a hnawh pinna hmunah chuan lei a tlak leh thin avangin hna thawh zui zel a ni a, motor kal theiha siam tlang a nih veleh a inchhawka kaltir a ni thin a, hnathawktute ruahman dan ngaichang turin PWD hotute chuan motor khalhtute an ngen a ni.
—————–

Nizan dar 8 leh dar 9 inkara ruah nasa taka sur avang khan Tachhip khuaa Pu Zathangvunga chenna in kawmthlang chu nasa takin a min a, he lei min avang hian a in hi min zui mai theia a lan avangin vawiin khan hnatlanga thiah nghal a ni a, Tachhip Branch YMA-in in thiah hnatlang a kohah hian mi 150 chuang an thawk chhuak a, Pu Zathangvunga in hi thiatin, in sakna hmanruate chu an dah thatsak vek a, Pu Zathangvunga te chhungkua hi an thenawma Pu Lalthara concrete in hnuaiah an insuan lut a ni.
—————

Aibawk Kohhran Pavalai Pawl, Ratu Kohhran tlawh tura zin chhuak chu vawiin chhun dar 11:45 vel khan Khawruhlian thlen hma, Tuivawl lui pelh hnuah chesualin kawng thlangah an tla a, kawng atanga bus let thla hi vanneihthlak takin Vaube kungin a lo dawl ding hlauh a ni. He bus-ah hian driver leh conductor nen, mi 35 an chuang a, an zingah hian hliam na leh ngaihtuahawm an awm lo nia thu dawn a ni. Khawruhlian YMA hruaitute hnen atanga thu dawn danin, hliam 6 zinga 4 chu tlemin an na deuh a, an 6 hian Khawruhlian damdawi in panpui an ni a, a theih dan dana enkawl nghal an nih hnuah Aizawl rawn panpui an ni. Ratu tlawh tura kal, Aibawk Kohhran Pavalai Pawlte pawh hi an chetsual hnu hian Aizawl lamah an lo kir leh nia thu dawn a ni. Hliam zinga tlema na deuh 4-te chu Pu Thangzawna, Pu Zaithangmawia, Pu Liantluanga leh Pu Biakthansanga te an ni a, ngaihtuahawm an ni lova, an harh tha niin YMA hruaitute chuan an sawi. An chetsualna chhan hi motor dang nen an inpelh laiin he bus hian kawng thlang lam, metal loh chin a dai a, lei a nem deuh avangin bus hi kawng thlangah a let thla ta a ni.
——————

UD&PA Minister, Pu Zodintluanga’n Smart City atana Aizawl khawpui buatsaihna atana sum lo kal chu a tha thei ang bera hman tangkai tum a nih tur thu, Zonet a hrilh a. Nimina sorkar laipuiin khawpui nuam, thianghlim leh tha, smart city atana tihchangtlun chhoh zel tur, khawpui 30 hming a puan zinga Aizawl khawpui a tel chu lawmawm a tih thu sawiin, hei hi UD&PA Department-a thawktute thawhrimna avang niin a sawi. Smart City thlanna hmasa zawkah Aizawl khawpui chu point khatin a tling lova, tling lo chiah chiahin tum 2  a lo awm tawh tih sawiin, nimina Union Urban Development leh Housing & Urban Poverty Allevation Minister, Pu M. Venkaiah Naidu-a’n Smart City-a buatsaih tura khawpui thlan chhuah 30 a puan zinga Aizawl khawpui a tel ve ta chu Aizawl chauh ni lo, Mizo mipui zawng zawng an lawm ve a rin thu a sawi. Pu Zodintluanga chuan, Smart City Project hian scheme hrang hrang mipui hriselna, khawpui cheimawi leh khawpui tihhmasawnna tur tam tak a keng tel tih sawiin, chungte chu sorkarin tha taka hmanga mipuiten hma an lo sawn theihna atana hman chu mipuite duh dan a nih bakah sorkar duh dan pawh a ni a, chumi tihhlawhtling tur chuan he Scheme hnuaia sum lo kal pawh a tha thei ang bera hman tangkai tum a nih tur thu a sawi.

Puan tawh angin, Union Urban Development leh Housing & Urban Poverty Allevation Minister, Pu M. Venkaiah Naidu chuan nimin khan Smart City 30 atana cheibawl tur a puan zingah Aizawl khawpui chu 27-naah a tel a. Nimina khawpui 30 puan belh tak nen hian Smart City atan buatsaih tura khawpui thlan chhuah chu khawpui 90 a ni ta a. Smart City-ah hin khawpui 100 thlan tur a ni a, hmun ruak 10 la awm chu state 20-in an inchuh ve leh dawn a ni.
————-

Tlabunga tlawmngai pawl hrang hrang intel khawm, Tlabung Progressive Society invuah chuan Mizorama damdawi in hmasa ber, Tlabung Sub Divisional Hospital, khum 30 awmnaah  Doctor pahnih tal dah turin sorkar an ngen. Hemi chungchanga resolution hi Tlabung Progressive Society chuan vawiin khan an siam a, Mizoram hmun hrang hranga Doctor indaih lohna phuhruk tura Mizoram sorkarin tun hnaia Doctor 26 a la chu lawmawm an tih thu sawiin, Mizorama damdawi in hmasa ber, kum 1872-a din tawh, Tlabung damdawi inah hian duh dangin Doctor an awm tha thin lo niin an sawi a, tunah hian Tlabung damdawi in chhawrtute chu a chhehvela khaw 30 vela mi 30,000 vel nia sawiin, Tlabung leh a chhehvel khuate chu sikserh leh natna dang tamna a nih avangin an mamawh Doctor pe turin sorkar an phut a ni.
——————

Mizoram Police-in Social media hmanga Online shopping chungchangah mipuite fimkhur turin a chah a. WhatsApp leh Facebook-a Buy and Sale Group hrang hrang chu misual thenkhatin mi bumna atana hman tumin, bum tur an zawng thin niin an sawi. Mi thenkhat chuan an thil lei tawh, to zawka hralh leh beiseiin Social Media-a Buy and Sale Group-ah hian an zuar chhawng leh thin a, an thil ruk leh dan lova an thil neihte awlsam taka tihral nan hmang thin pawh an awm bawk avangin mipuite chu online-a thil man tlawm ngawr ngawr lei a him lo tih hre turin a chah a ni. Thil hralh ruk lei palh chu pawisa tam tak chàn theihna a nih avangin Facebook leh WhatsApp hmanga thil lei tum reng reng, tlawm lutuka zawrh chu inbumna emaw, mi thil ruk leh thubuai awm laite a ni thei tih hre tura chahin, Secondhand mobile lei tumte chu Cash memo, Phone Box, Original Charger leh accessory dang dil thin tur leh hetiang pek tur nei lo chu lei sak loh a him zawk tih hre reng turin a chah bawk.
————

Vawiin chhun khan Central YMA Kumpuan Sub Commmittee-in Inrinni hmasa-a Iron rod & Cement Dealer-te nena an thu rel bawhzuiin, dan lova Iron rod leh cement zuarte dap chhuah beihpui an thlak. Central YMA Kumpuan Sub Commmittee chuan veng tina YMA Branch-te nena tangrualin khawng leh khauh zawka thawh an tum a. Gas bur khawih chingpena zuar thinte pawh tha thlah lova dap chhuah zel an tum thu an sawi bawk. Kumpuan hruaitute chuan veng thenkhata Gas latuten an Gas lak an bùk that duh loh thin avangin an thahnemngaihna chu a sâwt tur angin a sawt lo nia an hriat thu a sawi a. Gas latute chu an gas bur buktir ngei turin an ngen nawn bawk.
Vawiin vek khan Central YMA Kuampuan hruaitute hian Chawnpuia Tawngtai Bethel Camping Centre tlawhin, a dinhmun an en a ni.
————–

Thla leh ni 1 atangin ram chhung hmun dang rualin Mizoramah Goods & Services Tax lak ve a nih dawn avangin Taxation Department, Kolasib Zone huam chhunga sumdawng 139-te chu nimin khan kalphung thar tur a hrilhfiah a, I&PR Conference Hall-a he hun an hmanah hian Deputy Commissioner of Taxes, Pu R. Zosiamliana chuan he chhiah lak dan thar hian sumdawng bungraw zuarte leh services sector-a thawk, kum khata cheng nuai sawm leh a chung lam hmang phak chin zawng zawngte leh Mizoram pawn atanga bungraw hralh tur la luttu zawng zawngte chu GST hnuai-ah hian chhiah pe turin an inziah luh vek a ngai niin a sawi. He training-ah hian Taxation Deptt.-a officer dangte pawhin tun hma lam atanga sumdawngte chu he dan thar anga chhiah pe tawh tur an nih avangin dan thar hnuaiah hian an inziah luh vek a ngai niin a sawi bawk. Kolasib Superintendent of Taxes, Pi Mona Zote sawi danin he dan hnuaiah hian sumdawng inziak lût tawh 199 an awm a ni.
—————–

Tun thla ni 4, zing dar 5 atanga chin hriat loha bo, Lalthlamuana, kum 12, Lalbiakmawia fapa, Lengpui Chiahpui Bazar venga mi chu, Lengpui khawtlangin ni 3 an zawh hnuah pawh hmuh a la ni lo. Lengpui khawtlang hruaitute hnen atanga thu dawn danin, Lalthlamuana hi Lengpui Chiahpui Bazar venga a ni-te In-a cheng a ni a, a bo  thu hi tun kar tir lam khan Sairang Police Station ah hriattir a ni a, Lengpui khawtlang hian Ningani atang khan khawtlang huapin an zawng a, Lengpui leh a chhehvel leh, thlám awm zawng zawng pawh an dap a ni.  Vawiinah kha chuan Lengpui khawtlang hruaitute hian Lalthlamuana hi a nawlpuia zawng lovin, VC leh YMA hruaituten Sairang leh Aizawl inkar bakah, Aizawl khawpui chhunga hmun hrang hrangah an zawng a, mahse an la hmu lo a ni.
————-

Mizoram Excise & Narcotics Department, Champhai Station-a miten nimin tlai khan ruihhlo, Heroin leh Beer tam tham tak an man a, an thu dawn bawhzuiin Mualkawi-ah Heroin No.4 gram 212 leh a neitu nia puh, Lalpekhlui, kum 23, Tahan, Myanmar, tuna Champhai Kanan Venga khawsa nia inchhal chu an man. Lalpekhlui hi ND&PS Act tlawhchhanin thubuai an siamsak a ni.
Champhaia Excise & Narcotics mite vek hian Tlangsam leh Tiau inkar kawngpuiah Myanmar siam, Dagon Beer, case 65, can 1,560 leh a neitu nia puh, Chawngchhuana, kum 52, Champhai Vengthlang nia inchhal chu an man bawk. He beer an man hi tualchhungah Rs 1,87,200 hu vel nia chhût a ni a, heroin No. 4 leh beer chungchanga man, Lalpekhlui leh Chawngchhuana hi Champhai Chief Judicial Magistrate Court-ah thawn nghal an ni.
———-

CM, Pu Lal Thanhawla leh Sports Minister, Pu Zodintluanga’n nimin khan Serchhip Stadium sak mek leh Serchhip Indoor Stadium-a infiamna hmun hma din mek an tlawh a. Hnathawh tawh chin leh hmabak awmte bakah harsatna awmte chu Department aiawh leh Contractor-ten an hrilhfiah a ni. CM chuan, Serchhip Stadium sak mekah hian Athletic Track 8 lane emaw, a theih loh pawhin 6 lane emaw tal dah dan pawh ngaihtuaha bawhzui nghal turin a buaipuitute chu a hrilh a, hemi hnu hian Serchhip Indoor Stadium-a Shooting Gallery leh Badminton Hall pawh a enfiah bawk.
————-

Synod Revival Meet vawi 6-na chu Ramthar Veng Kohhran Biak Inah,  nizan atang khan neih a ni a, nakzan thleng hi a awh ang. He Harhna Inkhawmpui thupui atan hian Sam 85:6 thu, ‘Min tiharh leh ta che’ tih hman a ni a, a tan zanah khan Synod Moderator, Rev. Lalzuithanga’n thu a sawi a, Mizoram hian harhna a mamawh tih sawiin, sumdawnna leh politics te, hnathawhna dang leh nun peng hrang hrang tidanglam thei harhna, mipuiten Pathian duhzawng an tih theihna tura nun kaihruai thei harhna chu Mizoram mamawh niin a sawi a, nakkum Assembly inthlan lo awm turah pawh, pawisa leh thil dang hmanga vote hralhte chu Pathian duhzawng aia Setana duhzawng titu an nih tur thu leh, a sawhkhawk chu an tu leh faten an la tuar ve ngei tur thu a sawi a ni.

Synod Revival Meet-ah hian naktûk chawhma inkhawmah hian Hebron Revival Team Speaker, Pu R. Lallungmuana’n thuchah
a sawi ang a, chawhnu-ah Jehova Jire Team Speaker, Pi PC. Vanlalnghaki’n thuchah a sawi ang. Chawhnu inkhawm banah Pathian faka zaikhawm a awm ang a, Mi lungngaite Thian Team Speaker, Upa Lalchhanhima Hnamte-in a kaihruai ang. Zan inkhawmah chuan  Synod Senior Executive Secretary, Rev. Lalramliana Pachuau-in thuchah a sawi ang a, Inkhawm ban lengkhawm hruaitu tur chu Gospel Reapers Team Speaker, Pu Lalsangluia Sailo a ni ang. Synod Revival Meet programme hi naktûkah ZAWLBUK channel-ah LIVE-a tihchhuah a ni ang.
————

Salvation Army, India Eastern Territory Territorial Commander leh Women’s Ministries Territorial President,  Commissioner Lalngaihawmi chu kum 37 leh thla 5 chhung, hun pum senga rawng a bawl hnuah tun thla tawp, June ni 30-ah hian pension-in a chhuak ve dawn ta a,  naktûk, Pathianni chawhma, Thianghlimna Inkhawm-ah hian Aizawl Temple Corps-ah amah thlahna inkhawm hman a ni ang. He inkhawmah hian a duh apiang tel turin Territorial Headquarters chuan a sawm a ni. Commissioner Lalngaihawmi hian kum 1978 atanga 1980 chhung khan Australia rama Sydney-a Salvation Army Training College-ah training a nei a, kum 1980 January ni 12 khan Salvation Army Officer atan nemngheh a ni. A rawngbawl chhung hian ram chhung hmun hrang hrangah mawhphurhna pawimawh tak tak a chelh a ni.

Salvation Army, India Eastern Territory-a Territorial Commander thar tur hi Commissioner Lalzamlova a ni a, a nupui, Commissioner Nu-i chu Women’s Ministries Territorial President thar a ni ang a, thla leh, July atang hian an mawhphurhna an chelh dawn a ni.
————-

Naktûk, Pathianni hi Salvation Army India Eastern Territory Calendar-ah  ‘Salvation Army Youth Sunday’ a ni a, hemi pual hian Corps leh Society tinah SAY-ten programme an hmang ang a, Camping/Crusade te, vantlang rawngbawlna te, damlo leh mi harsate tanpuina leh tawngtai sakna te an hmang dawn nia hriat a ni. Mahni bial chhung theuhah mi dangte tanpuina leh khawtlang tana luang chhuak turin Salvation Army thalaite hi an inbuatsaih a, ruihhlo-in a tihbuai, khawlaia khawsate hnena rawngbawlna hmang te leh India Eastern Territory chhunga Outreach Area tlawhte an awm a, Biak inah inkhawm programme hlawhtling tak nei turin an inbuatsaih a ni. Thianghlimna Inkhawmah ‘Chhandam tura chhandam’ tih thupui hman a ni ang a, Chhandamna Inkhawmah ‘Thalaite leh Social Media’ tih thupui ngaihthlak a ni ang.
————

Nimin khan Territorial Outreach Mission Board chu Territorial Headquarters Board Room-ah an thu khawm a,  Biak in sakna tur te, Quarters sakna tur te, Outreach Workers Health Benefit leh Appointment chungchangte sawiho a ni a. Territorial Commander leh he Board Chairman, Commissioner Lalngaihawmi an thlah nghal bawk.
———-

Tun thla ni 16, Zirtawpni hmasa khan Mizoram Synod, Chhim Bial Administrative Secretary, Rev. RC. Lalnghakliana leh Area Promoter, Pu Albert Lalhmangaiha chu tun hnaia ruahsur nasa, leimin leh tuilian tuara Phairuangkaia chhiat tawkte tlawhin an kal a, Phairuangkaia chhiat tawhnaah hian mitthi pali an awm a, vanduaina tâwkte tan hian Mizoram Synod hmingin Rs. 69,000/- an pe a ni.

Vanduaina thlenna dang, Tlabung leh Diblibagh pawh Thawhtanni khan an tlawh leh bawk a, chhiat tawkte chhawmdawlna atan Rs. 30,000 a hlan leh a ni. Tun tuma fur tuilian leh lei min hi chhim lama Presbyterian Kohhran hmun pawimawh hrang hrangte pawhin an tuar a, Malsury Home Mission Quarters leh Biak Inte pawh tuilian hian a chim pil deuhthaw a, Missionary-te pawh an buai hle a, tawngtaisak an mamawh hle nia thu dawn a ni.
—————

Mizoram Baptist Kohhran Relief & Development Department pawhin he vanduaina thleng tuartute hi Bial kal tlangin chhawmdawlna a pe mek a, BCM Mission school tam takin he chhiatna hi an tuar a, Tuichawng-a Baptist Mission School hmun hma chu a min nasa a, Office phei chu luah ngam a ni lo a, Zawlpuia BCM school leh Quarters pawh nasa takin tuilianin a chîm a, siam that ngaite pawh a awm nual a ni. Tlabung Serhuana thawktu Quarters leh Biak leh In engemaw zât chu tuiin a chîm nasa hle a, Chawngte-a Baptist Boarding School pawh tuiin a chîm a, thawktute hmun him lamah an inthiar chhuak nual a ni.  Matisora-a BCM Missionary Quarters chu De lui lianin a chîm pil vek a, a chhûngah chirhdiak, khup thlenga dai ngai a hnutchhiah a, a chhuat a khi bawk a, luah ngam a nih loh avangin thawktute pawh mi In luahin an awm mêk a ni. Hengte bâkah hian Kawrpuichhuaha Baptist Mission School pawh tuiin a chîm avângin luah theih a ni lo va, thawktu Quarters pawh tuiin a chîm a, Biak In lamah an insuan lût a ni.
———

Shillong-a Mizoram Baptist House leh Pastor Quarters thar, kumin January thlaa sak tan chu zawh fel a nih hnuah Nilaini khan BCM General Secretary, Rev. F. Ramdinmawia’n Pathian hnenah hlanin a hawng a,  a hawnna Inkhawm hi Shillong Pastor Bial Chairman, Rev. R Lalnunzira’n a kaihruai a, Shillong Bial Secretary, Upa Sailothanga Sailo-in a sak dan report a pe a ni. He inkhawmah hian BCM Executive Secretary, Aizawl-a mi, Rev. Dr. K. Lalrinthanga leh General Secretary, Rev. F. Ramdinmawia’n thu an sawi bawk.  Shillong-a Baptist Pastor Quarters leh Guest  Room thar hi tuna Baptist House luah lai chhawng chung chung berah cheng nuai 37 vel senga sak a ni a, Pastor Quarters bakah mikhual thlenna, pindan pathum a awm a ni.
———

Thawhtanni khan Aizawla Mission Vengthlang Bial BCM Pastor Quarters, cheng nuai 48 senga sak pawh BCM General Secretary, Rev. F. Ramdinmawia’n a hawng a, he Pastor Quarters sak nan hian Headquarters atanga tanpuina an hmuh, cheng nuai 10 bâk zawng chu Bialin theihtâwp chhuahin nikum January thla atang khan atang khan an sa a ni.
———

Senate of Serampore College hnuaia BD Final result chu tun hnai khan a chhuak a, Aizawl Theological College atangin
First Class, A Minus Grade – 1,  Second Class B plus Grade – 10, Second Class B Grade – 11, Second Class B minus Grade – 1, an vaiin mi 23-in an pass a ni.

AICS atang pawhin mi 20-in Second Class-ah an pass vek a, 9-in B plus grade-ah an pass a,  11-in B Grade-ah an pass bawk a ni
———–

Central YMA leh MFA tangkawp buatsaih, TT Royte Trophy – Inter Branch YMA Football Tournament, 2017-ah Ramhlun South an Champion ta a, nimina Final khelh zawh takah Ramhlun South hian an bitum, Chanmari chu si khat faiin an hneh a ni. May ni 16 atanga khelh, Inter Branch YMA Football Tournament tum 19-ah hian team 141 an tel a. Champion team Ramhlun South-in Trophy, medal, certificate leh cheng nuai 1 an dawng a, Pahnihna Chanmari-in Trophy, medal, certificate leh cheng 50,000 an dawng a ni.
—————–

Vawiin khan Aizawl-ah khaw lum lai berin Celsius Degree 30.5 a ni a, a vawh lai berin Celsius Degree 16.1 a ni a, hemi chhung hian ruah milimeter 13 a sur a ni. Boruak hi a ro lai leh a hnawn lai berin za zela 95 ve ve a ni.
———

Naktuk, Pathianni-ah chuan khaw lum lai berin Celsius Degree 29 vel, a vawh ber laiin Celsius Degree 13 vel a nih rin a ni. Zing dar 4:33-ah ni a chhuak ang a, tlai dar 6:09-ah a tla leh ang.
———

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken