TUALCHHUNG CHANCHIN THAR

Member 24 awmna, Chakma Autonomous District Council-a Congress sorkara Executive Member 4 leh dinhmun pawimawh chelhtu dang mi 3-in an nihna atanga banna, CEM, Pu Kalikumar Tongchongya hnenah nimin khan an thehlut. Chawngte atanga thu dawn danin, Congress party chhuahsan chuang lova banna thehluttu Executive Member 4-te hi Taxation changtu, Pu Amit Kumar Chakma, Primary School Education changtu, Pu Amar Smriti, Road Transport changtu, Pu Chitra Kumar Chakma leh Environment & Forests changtu, Pu Susen Chakma an ni a, heng mite hi MDC 3, dinhmun pawimawh chelhtuten an thlawp a, hengte hi Town Planning Chairman, Pu Mohan Chakma, Primary School Education Board President, Pu Susil Kumar Chakma leh Deputy Chief Whip te an ni. He thil thleng chungchanga Zonet zawhna chhangin CADC Chief Executive Member, Pu Kalikumar Tongchongya chuan banna an thehluh nachhan chu Lai Autonomous District Council-a tun hnaia thil thleng ang deuha Council sorkar hruaitu thlak an duh vang niin a sawi a, heng mi 7 hian Legislature party thar leh an hruaitu tur an la thlang lova, amaherawhchu, hruaitu atan hian Pu Amit Kumar Chakma an hual nia sawi a ni. Heng mite hian Aizawlah sorkar mi pawimawhte an dawr mek a, an party President, CM, Pu Lal Thanhawla pawh hmuh an tum a ni. Zawhna dang chhangin CEM chuan heng mite hian an nihna atanga banna an thehluh hnuah tunah hian CADC-ah CEM telin EM 4 an la awm a, Executive Secy. chu Council Member Secy. a nih bawk avangin rorel kawngah leh hnathawh kawngah harsatna an nei chuang lo niin a sawi a, a kaihhruai sorkarin thlawptu a la ngah tawk niin a sawi bawk. Chakma Autonomous District Council-ah hian Elected Member 20 leh Nominated Member 4 an awm a, Elected Member 20 zinga 17 chu Congress MDC an ni a, Independent 1-in a thlawp a, a bak member 2 te chu BJP leh MNF an ni.  
—————–

Remna zawnga Mizoram sorkar leh HPC(D) te inbiakna, naktuka Aizawla chhunzawmna atan engkim peih fel a ni tawh a, sorkar lam atanga thu dawn danin, he inbiakna hi State Guest House-ah naktuk chhawhma dar 11-ah tan a ni ang. Inbiakna turah hian sorkar lam chu Home Department-a Additional Secretary, Pu Lalbiakzama’n a ho ang a, hetah hian Home Department Officer-te bakah SP (CID), Pu Rodingliana Chawngthu pawh a tel dawn a ni. He inbiaknaa HPC(D) aiawhtu tur mi 6-te chu HPC(D) Working Chairman, Pu LT Hmar-in a ho dawn a, mi dangte chu Pu Thaliana, Dr. John Pulamte, Pu David Buhril, Pu Lalthlamuana leh Pu Muanpuia te an ni a, heng mite hian thlawhnain vawiin khan Aizawl an lo thleng a ni.
——————-

Indian Medical Association General Headquarters thuchhuak anga ram puma Doctor-ten lungawi lohna lantir nana Badge dum an bel chu Mizorama Indian Medical Association member, Doctor-te pawhin vawiin khan an zawm ve a, Badge dum bel chungin hna an thawk a ni. Indian Medical Association, Mizoram State Branch hruaituten ZONET an hrilh danin, lungawi lohna an lantir chhan chu tun hnaia West Bengal sorkarin Clinical Establishment (Registration, Regulation and Transparency) Bill, 2017 a pass chu Doctor-te tan a him loh vang leh, thil tha lo tak a thlen theih vang niin an sawi a, hei hi siam that an phut niin an sawi. Siam tha tura an thil phut lian zual te chu – Doctor-ten damlote, a tha thei ang bera an enkawl chungin thil dang avangin an enkawlna chu a ngeih lo thei a, chutiangah chuan doctor-te chu damlo ngaihthaha puhin, zangnadawmna leh thil sual ti luia puha thubuai siamsak theihna turin Bill hi duan niin an sawi a, damlo an enkawl kawngah Doctor-te an tim phah theih dawn bakah an thiamna pawh an hman ngam loh phah theih dawn niin an sawi.

Damdawi in leh Doctor-te hnathawh dan thlithlaitu leh an chunga hremna hial lek theitu tur, Regulatory Commission din tura tih pawh Medical Council a awm tawh tho avanga an duh loh thu te, din a nih dawn chuan member-ah damdawi lam thiam tam tak dah an duh thu te, Damdawi in thenkhat, hlawkna duh avanga din te leh, Private doctor-ten an thiamna hmanga mipuite rawng an bawl theihna tura an din, damdawi inte huang khata dah chu tha lo an tih thu te, he bill hian Private damdawi in chauh ni lo, sorkar enkawl Damdawi in leh Clinical Institution te pawh huam vek se an duh thu leh sorkarin mimal clinic leh mimal Damdawi ina damlo enkawlna man, a duh dan anga a bithliah theihna tur pawh tha lo an tih thu leh hei hian damlo enkawlna kawngah intlansiakna a tibo thei dawna an hriat thu te, mimal damdawi Ina dam lo enkawlna senso thlithlai tura sorkar ni lo, Independent Agency dang siam an duh thu leh damlo enkawlna man bithliah chu damdawi In neitute thuneihnaah dah leh, sorkar chu a hnuaia damdawi In leh Health Scheme rate-ah chauh thu nei tura an duh thu te niin an sawi.
—————–

Mizoram Government Doctors’ Association (MGDA)-in vawiin khan Aijal Club-ah Annual General Conference vawi 34-na an hmang a, a hmanpuitu, Health Minister Pu Lal Thanzara chuan, ram dang angin Mizoramin khawl leh hmanrua duhthusam la nei lo mah se, Doctor-ten hnathawh theih loh phah angah inngai lo se a duh thu leh, hmanraw tha awm lo chung pawha damlote thlamuan, an rilru hneh leh huaisenna pe theitu an ni tih inhre turin a chah a ni. MGDA Conference hi an Vice President, Dr. Chawngthanchhunga’n a kaihruai a, an member 5 pension te thlahna thuziak an hlan bakah nikum chhunga an member thi te an sun a, chawhnu lamah kum 2017-19 chhunga an pawl hruaitu turte an thlan bakah ro an rel nghal a ni.
——————

Thawhlehni zana tan, Chhandamna Sipai Pawl, India Eastern Territory Kum 100 tlinna lawmna chu, R. Dengthuama Indoor Stadium, Mualpui-ah chhunzawm zel a ni a. Pathianni zan thleng a awh ang. Sipai pawl hian an kum 100 tlinna hi kawng hrang hranga an lo lawm tawh hnuah, Thawhlehni zan atang khan General Andre Cox te nupa hovin a lawmna pui ber an nei mek a, India Eastern Territory chhung leh pawn atangin sipai thahnem tak an tel bawk a ni. Vawiin chawhmaa inkhawmah chuan Band, Zaipawl leh Malzai te ngaihthlak a nih bakah General Andre Cox-a’n Pathian thuchah a sawi a, chawhnu inkhawm chu Salvation Army Youth pualin, programme hlimawm tak hman a ni a, Western Division Divisional Youth Secretary, Capt. T. Zothanmawia’n Pathian thuchah a sawi a ni. Zanin inkhawm chu Kohhran hmeichhia, Home League pual a ni ang a, General nupui, Commissioner Silvia Cox-i’n Pathian thuchah a sawi ang. Vawiin chawhnu khan General Andre Cox hian Chanmari West Corps Biak in thar a hawng bawk a ni. Puan tawh angin April ni 26, hi Mizorama Chhandamna Sipai Pawl dintu, Lt. Colonel Kawlkhuma’n Shimla-a SA Officer a train zawh hnua Aizawl a lo luh kum 100 tlinna a ni a. He ni hi India Eastern Territory chuan he Territory-a Chhandamna Sipai Pawl lo luh tan ni-ah pawmin, kum tin he ni hi Ni Pawimawhah dah thin a ni.
———

Lawngtlai District-a Vasei Police Station-ah vawiin khan Tuikuk hel pawl, Bru Democratic Front of Mizoram mi 2 an inpe. Lawngtlai SP, Pu Lalsanglura hnen atanga Zonet thu dawn danin, heng mite hi Nghalimlui khaw mi ve ve, Phedela, Phonoraia fapa leh Phulorai, Changriha fapa an ni a, Vasei Police Station OC chuan lo manin thil tihfel ngai a tifel mek a, heng mi pahnih te hi Lawngtlaiah thawnin, Magistrate hmaah hruai an ni ang a, Police-ten thu an zawhfiah hnuah leh thil tihfel tur an tihfel hnuah Magistrate thupek angin Jail-ah dah an ni ang. Bru Democratic Front of Mizoram hel pawlte hi Mizorama ralthuam nei pawl zinga mi, mi dangte rikrapa pawisa pawh khawn thin an ni a, Bangladesh-a an tawmbona hmun tlawh chhana vak kual vel thin an ni a, anmahni zingah tun hnaiah buaina leh inthahna a chhuah avangin an darh a, an zinga mi 5  chu tun hnai khan an ralthuam nen Mizoram Police ten an lo man tawh a ni. Vawiina Police kuta inpe ta, Bru Democratic Front of Mizoram mi pahnih hi Police-ten ngawrh taka an zawn lai, hmun hrang hranga tlanchhe thin an ni a, an tana thil pawi zawk a thlen lohna tura an kuta inpe mai tura Police-ten an ngenna chu an zawm ta niin Lawngtlai District Police hotute chuan an sawi a ni. Heng hel pawl mi pahnih inpete hian ralthuam an luhpui lo a ni.
——————-

MLA hlui Pu Saitlawma’n BJP a zawm a, vawiin khan Lungleia BJP District Heagquarters Office-ah BJP Mizoram Pradesh General Secretary, Pu Vanlalhmuaka’n a lawm lut. BJP thuchhuah sawi danin, vawiina BJP zawm thar zingah hian Lungsen VC II-a Congress Member Pu Vanhminga leh Thenhlum VC-a MNF member, Pu Rawngbawla pawh an tel a, mi thar lawm luhna inkhawm hi District Hqrs. President Dr. Aichhunga’n a kaihruai a ni. Pu Vanlalhmuaka hian vawiin vek khan Lungleiah  thu thar la khawmtute a kawm nghal a. Mizoramah Pu Zoramthanga leh Pu Lal Thanhawla tel lovin sorkar a piang thei lo nia sawi thin chu tihtawp a hun tawh niin a sawi a, BJP kaihhruaia North East Democratic Alliance (NEDA) din takah MNF-in tel ve an dil nasat avangin telh ve nia sawiin, hei hian nakkuma Assembly inthlanpui neih turah BJP leh MNF chu an thawk ho dawn tih a kawk lo niin a sawi a, MNF chu Assembly House-ah eptu pawl an nih avangin an thawhpui rih mai niin a sawi. BJP General Secretary chuan, ram mipui zawng zawngin in leh lo an neih theihna tura sorkar laipui scheme, Housing For All chu Congress Party-in vote a zawnna tura siam a ni lo tih sawiin, a dawngtute chu endik vek a nih tur thu leh inkaiihruaina dan kalha dawng an lo awm a nih chuan a pung nen an rulh leh vek a ngaih tur thu a sawi a, dik lo taka petute chuan Jail an tan a ngai dawn bawk niin a sawi. Mizoramah BJP-in thuneihna a chan chuan Lungleia Mizoram Polytechnic chu State Engineering College-a hlan kai a nih tur thu leh Lungleiah Law College din a nih tur thu pawh Pu Vanlalhmuaka chuan a sawi a, Lunglei-ah Mizoram University Campus siam a ni dawn bawk niin a sawi.
————–

Nimin thleng khan Aizawl District-ah zu lei phalna, Liquor Card nung 17,295 a awm. MLPC Act hnuaia zu zawrh a nih hnuah zu lei phalna hi Mizoram pumah mi sing 7 chuang hnenah pek a ni tawh a, Card hi kum 1 chhung hman theih a ni a, tunah hian Renew theih hun hawn mek a ni. Card thar siam duh tan cheng 340 chawia siam theih a ni a, Card hlui Renew nan cheng 300 chawi a ngai thung a ni. Aizawl District Excise Superintendent, Pu Z. Lalhmangaiha chuan, tun hnaia Excise Minister, Pu R. Lalzirliana’n MLPC Act hnuaia zu khuahkhirhna khauh lehzuala bawhzui a nih tur thu a sawi chu chak taka bawhzui niin Zonet a hrilh a. Aizawl District-ah hian Mizoram Home Guard, 1st Battlion MAP leh 5th IR Battalion dawr telin dawr 21 hawn mek a ni a, heng dawr hrang hrangah hian Duty dah vek an ni a, hmun thenkhatah phei chuan Duty hi 3-te dah an ni a, Excise Inspector 3 chu zu dawr 7 theuh chantirin dawr hrang hrang an fang kual thin a. Sub Inspector-te pawh an chan tur semin, dawr ven uluk ngaizual bikte chu nilenga thutchilh chang an nei thin niin a sawi. Pu Z. Lalhmangaiha chuan, zu lei phalna Card nei lote chu dawr chhunga luhtir an ni lo hrim hrim nia sawiin, zu lei tumte chu Gate-ah Card an neih leh neih loh endik hmasak zel a ni a, zu lei zo lo chhuakte pawh an thil lei leh Card-a ziah luh dan a inmil leh inmil loh lo enfiah leh zel leh vek niin a sawi a, zu dawr neituten Ware House atanga a hlawma an lak chhuah phalna pawh tun hma lam aiin a zatve deuh tawhin a tlahniam niin a sawi.

Zawhna chhangin Pu Z. Lalhmangaiha chuan, Zu Card hi mi pakhat hminga pakhat aia tam a awm loh nan Computerised vek tura tih ni mah se, thawktu indaih lohna leh mipui nawrna avangin kuminah chuan tih theih a ni lova, nakkum atang chuan Computer-a chhinchhiah vek tum a nih thu a sawi. Zu lei phalna Card nei lo, zu lei luih tum an awm thin avangin dawr hrang hrangten harsatna an tawk thin niin Aizawl District Excise Superintendent chuan a sawi a. Officer lian tak tak zingah pawh an thiltihtheihna hmanga Card tel lova zu lei luih tum an awm thin nia sawiin, thenkhat phei chuan dawra duty-te vau an ching niin a sawi a, zu in ve duh tho si, a leina tur Card siam duh lo an awm thin chu a buaithlak a, a in duh chuan mahni pualin Card siam vek thei se tih chu an Department duh dan a nih thu a sawi bawk.
————-

MNF General Headquarters Legal Board Chairman, Pu J Lalremruata Hmar-in, kawng hrang hranga an zir chian hnuah Mara Autonomous District Council sum, cheng vaibelche 33 vel chu MADC-a Congress sorkarin an tichingpen ngei nia an hriat thu Press mite a hrilh. Vawiin khan Siaha Press Club-ah Press mite kawmin Pu J. Lalremruata Hmar chuan, MADC hotuten sum an tihchingpen hi sorkar laipui atanga scheme hrang hrang hmanga hmasawnna hnathawhna tur niin a sawi a, a hman dan tura kaihhruaina awm sa bawhchhiaa a ni lo zawnga hman nia sawiin, Executive Member ni laiten Contract lian tak tak an thawk ngei a ni tih chianna, Bill tam tham tak an lakna sulhnu hmuh pawh a awm niin a sawi. He District Council-a Congress sorkar-a dinhmun pawimawh tak tak chelhten mahni sahmim tihpuar nan anmahni leh an fate leh lainate In hmun an inpek danah mipui rawngbawl chu an tum a ni lo tih a lang chiang hle nia sawiin, chhun engah Mara ram mipuite chanvo an fanghma no ei hmiah hmiah a, dan bawhchhiat chu an pawisa lo hle niin a sawi bawk. Pu J. Lalremruata Hmar chuan, heng sum tihchingpen chungchangah hian nikum October ni 26 khan MNF General Headquarters-a Pu. H. Lalhlimpuia leh Pu Lalrindika hmingin Anti-Corruption Bureau-ah FIR 10 thehluh a ni tih a sawi a, ACB lam pawhin an thu thlen chu thu tlinga pawmin vawi engemawzat, MADC-ah pawh team an intir tawh niin a sawi. Heng hlemhletna nasa tak, ACB ten an bawhzui hi tawp mai tur a nih loh thu leh result lian tak hmuh a ni ngei dawn niin a sawi a, an thil tih chu tute emaw hnam bil emaw beihna leh dawta puh na a nih loh thu sawiin, MADC mipuiten an dikna chanvo an chan theih nan leh a nihna anga hmasawnna a thlen ngei theih nana ti an nih thu leh, heng hlemhletna nasa tak awm avang hian tuna MADC inthlan turah pawh Congress chu thuneihna pek leh chi an nih tawh lo niin a sawi bawk.
————–

Vawiin chawhma khan Aijal Club-ah Law Minister, Pu Lalsawta’n Mizoram sorkar hnuaia Public Prosecutor leh Advocate te intuai hriamna atana buatsaih, ni hnih awh tur, Training a hawng a. Public Prosecutor leh Advocate-te chu titipuiin, an hmasawn dan te a zawh bakah chak zawka hna an thawh theihna tura an mamawhte leh an harsatna te a zawt tih sawiin, Court-ah sorkar dinhmun a that theih nan traning chu buatsaih a nih thu a sawi. Public Prosecutor leh Ukil-te hian an training chhung hian dan chi hrang hrang an zir chiang dawn a ni.
———–

PRISM-in Mizorama rorelna dik leh sorkar tha a awm theihna tur nia sawia thawhpuia mipuite sawmna beihpui a thlak chu chhunzawm zel a ni a, vawiin khan Aizawla Millennium Centre leh Dawrpui pheiah an hmathlir tarlanna thuziak an sem leh.  Hemi puala inkhawm tawi neihah Prism General Secretary Pu RL Liantluanga chuan, Mizoramah rorelna dik leh sorkar tha a awm theih nan nakkuma Assembly inthlanpui neih turah mipuiten ngaihtuahna dik an put a tul tawh hle niin a sawi a. Prism sawmna beihpui hi Aizawl bakah Champhai, Lunglei, Serchhip leh Kolasib District-ah thlak a ni tawh a, naktukah Mamit District-ah hawn leh tum a ni.
————

May ni 4, kar leh Ningani-a Mara Autonomous District Council inthlanna atana Presiding Officer leh Polling Officer-te training,  ni hnih awh tur chu vawiin khan MYA Multipurpose Hall-ah tan a ni a, a hawngtu, Siaha Bawrhsap, Pi Harleen Kaur, he inthlanna tura Returning Officer ni bawk chuan inthlanna chu muanawm, dik leh felfai taka hlen chhuah tum turin Presiding Officer leh Polling Officer te chu a fuih a ni. He training hawnna inkhawmah hian Additional DC, Pu Dolianbuaia leh DRDA Project Director, Pu R. Lalremsanga, Assistant Returning Officer ve ve bakah, SDO (Sadar), Pi Lalnunmawii leh District Level Master Trainer, Pu H.Ramhluna’n thil pawimawhte an zirtir a ni. Mara Autonomous District Council inthlanna turah hian seat 25 inchuh turin candidate 70 an awm a, vote thlakna turin Polling Station 80 siam a ni dawn a, vote nei thei awm zawng zawng chu 37,258 an ni a, heng zinga 19,289 chu hmeichhia, a bak 17,969 chu mipa an ni. He inthlanna turah hian campaign boruak a sang chho tan tawh a ni.                ——————

Champhai District-a Khuangthing Govt. Middle School chuan an sikula thawk tawh, CSS Hindi Teacher, Pi Lalmuanpuii chu a hlawh tur thawh khawmin an ruai zui dawn niin Khuangthing Branch YMA President, Pu C. Lallianzuala’n a sawi a, CSS Hindi Teacher hnathawh hun a tawp avanga an sikula zirlai tam takin Hindi zirtirtu an mamawh em avangin zirlai pakhatin thla tin Rs. 40 theuh an thawh ang a, a bak zawng chu sikul zirtirtuten an thawh khawm dawn a ni. Khuangthing Govt. Middle School-ah hian zirlai 152 leh zirtirtu 5 an awm a ni.
——————-

Election Commission-in software thar, Electoral Roll Officer Net tia vuah, kumin July thla atanga hman tura a ruahman chu vawiin khan Serchhip DC Office-ah leh Champhai DC Office-ah zirho a ni. Serchhipa zirhona hawngtu, Dist. Bawrhsap, Pi Sangchhin Chinzah chuan sorkar hnathawktute chu hmasawnna leh thil thar lo piang chho zel hman thiam tum turin a fuih a, inthlanna thil phei chu ram rorelna leh inrelbawlna intanna a nih avangin a pawimawh lehzual tih a sawi.  ERONet hi Election Commission of India-in ram khua leh tuiten awlsam leh rang taka Electoral Roll-a thil tihdik ngaite, online-a an tih theihna tur niin Bawrhsap chuan a sawi a,  online hmang lova dilna lutte pawh ERONet hmang hian lak luh theih a nih dawn avangin Chief Electoral Officer atanga Data Entry Operator thlenga anmahni hna chanpual theuh an tihpuitlin theihna tur niin a sawi bawk. He training-ah hian ERO, AERO leh Data Operator te chu Master Trainer, Pu Laltlanmawia’n a zirtir a ni.
—————–

Champhaiah pawh vawiin vek khan hetiang training hi DC Conference Hall-ah neih a ni a, Additional DC, Pu C.C. Lalchhuangkima’n he thil thar hi awlsam zawk leh felfai zawka hnathawh theihna tur niin a sawi. He training-ah hian District Level Master Trainer, Pu Beitlotha Nohro-a’n he hmanraw thar chungchang hi a sawifiah a ni.
————–

Lawngtlaia Central YLA hruaituten Lawngtlai bul, Thingkah khaw hlui bula 3rd IR Battalion awmna hmun tur, NECS-in a sak mek chu vawiin khan a hmunah kalin an en ho. YLA hruaitute hi an President, Pu J. Sangthangpuia’n a hova, vawiin thlenga an hnathawh dan chu YLA hruaitute chuan tha tawkah an ngai a ni. Thingkaha 3rd IR Battalion hmun tur hi kum 2014 July thla khan sak tan a ni a, cheng vaibelchhe 30 senga he hna zo fel thuai tur hian NECS hian hnathawktu 100 rual a ruai mek a, thil dang bakah building an sak tur zawng zawng chu 41 a ni a, hun tiam chhunga zo hman turin tan an la zui zel a ni.
—————-

Lawngtlai Horticulture Exhibition, 2017 chu vawiin khan Council Venga  LADC Conference Hall-ah Horticulture Minister, Pu P.C. Lalthanliana’n a hawng. He Horticulture Exhibition hi Lawngtlai Florists Association, Lawngtlai District Horticulture Officer buatsaiha neih a ni a, Horticulture Director, Dr. Elizabeth Saipari pawhin thu a sawi a, inkhawm hi Lawngtlai DHO, Pu L. Lalhmingmawia Pachuau-in a kaihruai a ni.
—————

Vawiin khan Aizawl-ah khaw lum lai berin Celsius Degree 32 a ni a, a vawh lai berin Celsius Degree 9.1 a ni.
———

Naktuk, Zirtawpni-ah chuan khaw lum lai berin Celsius Degree 33 vel, a vawh ber laiin Celsius Degree 11 vel a nih rin a ni. Zing dar 4:48-ah ni a chhuak ang a, tlai dar 5:45-ah a tla leh ang.
———

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken