RAM PAWN CHANCHIN THAR

Muslim-te tana khawvela hmun thianghlim ber, Mecca-ah nimin khan, thihchilh bomb tihpuah tum mi pakhat chu police te’n an hual beh avangin a intihlum. Saudi Arabia Interior Ministry sawi danin, Muslim-te thla serh, Ramadan a zawh dawn hnaih avangin an khawpui thianghlima pung khawm turte beih tum pawl hrang hrang pathum an awm nia an hriat thu an sawi a, tuna mi pawh hi an fimkhur sa avanga man chhuak thei an nih thu leh, an hriat chhuah tirhah hian a inkâp phawt a, Mecca-a Grand Mosque bula a tlanchhiat hnuah a bomb pai hi a tipuak tih an sawi a, a bomb tihpuahna in hi a chim a, police panga leh ram dang mi, khualzin 6 an hliam tih an sawi bawk. He thil thlen hma lawk hian Saudi police-te hian mi firfiak nia rinhlelh, mi 5 an man thu leh, man tura an chhinchhiah tawh sa mi pakhat an kah hlum thu an sawi bawk a ni. Nikuma Ramadan tawp dawn hnaihah pawh khan ISIS mi firfiak pahnih chu Mecca dâiah kah hlum an lo ni tawh a, thihchilh bomb pahnih tihpuah a ni bawk. Iran chuan Mecca-a thil thleng hi a dem thu sawiin, mi firfiakte beihna kawngah hian a tul phawt chuan Saudi Arabia chu puih a hnial loh thu a sawi a ni.
———–

China ram chhim lama Sichuan Province-ah lei min nasa takin mi 140 chuang a chhilh. China sorkar chanchinbu, Xinhua News Agency sawi danin, lei minna hmun hi chhim-thlang lam, Tibet hnaiha Xinmo khuaah a ni a, leimin hian in 46 a hnawl tawh a,  a chhilh zinga mi 3 chauh nung dama lak chhuah an ni a, chin hriat loha awm hi mi 140 vel an nih thu, tualchhung roreltuten an sawi a ni. China President, Xi Jinping-a chuan chhanchhuah hna hi a rang thei ang ber thawk turin thuneitute a hrilh a, a buaipuitute chuan an mi chhanchhuahte hi nupa tuak khat leh an fa, thla hnih mi niin an sawi a, chin hriat loha awmte pawh hi lei min hian a chhilh vek nia an hriat thu an sawi.
—–

Turkey rama intihhlimna hmun pakhatah electric kal sualin tui cheng lai, mi 5 a man hlum. Thi zingah hian he intihhlimna hmun neitu, kum 58 mi leh a fapa, kum 30 mi pawh an tel a, mi dangte hi kum 12, kum 15 leh kum 17 mi an ni. Thuneitute sawi dan chuan tui chengte hi electric kal sual hian a man hnuah, a neitupa leh a fapa hi heng mite chhanchhuah tumin tui-ah hian an zuang lut a, an panga hian damdawi ina hruai an nih chuan electric man avang hian an thi tawh niin doctor-te chuan an sawi a ni. Police-te chuan he thil thleng hi an chhui chian thu leh, tui chenna hmunah hian electric kal sual a awm palha a venna engmah vuah a nih loh thu an sawi a ni.

—–

Pakistan rama khawpui pathuma mi firfiakten bomb leh silai hmanga beihpui an thlakah, mi 60 vel an thi a, mi dang 100 vel an hliam. Nimina Pakistan ram chhim thlang lama Quetta khawpuia police motor pakhat bomb hmanga beih a nih hnu khan, Kurram Agency khawpui, Parachinar-ah nimin vek khan bomb pahnih tihpuah a ni a, sorkar thuneitute sawi danin, a hmasa zawk hi Turi Bazar-ah a puak a, helai hmunah hian Ramadan kut tawp ni, Eid-ul Fitr puala bazar turin mi tam tak an kal a, bomb tihpuah a nih hnu hian chhanchhuah hna thawh nghal a nih bakah, tualchhung mite chuan sorkar leh khawtlang hruaitute chu mipui hum zo lo-ah puhin an dem nasa hle a ni. Hetia boruak a sosan lai tak hian bomb dang a puak leh a, bomb puak hi a na hle nia sawi a ni a, he thil thlengah hian mi 45 an thi a, midang 100 vel an hliam a, hliam zinga mi 20 vel chu an ngaihtuahawm hle nia hriat a ni bawk. Bomb tipuaktute hi eng pawla mi nge hriat an la ni lo.

Nimin tlai khan Karachi-ah bike-a chuang, ralthuam keng mi 2-in kawng sira ding, police office-te chu a kap a, he thil thlengah hian police officer 4 an thi a ni. Pakistan PM, Nawaz Sharif-a chuan he thila inhnamhnawih, mi firfiakte chu zawn chhuaha, a na thei ang bera hrem an nih tur thu a sawi a, Turi Bazar leh Karachi-a pawi khawihtute pawh hi hriat an la ni lo na a,  he hmun hi Sunni Muslim mi firfiakte chet tamna a nih avangin heng ho tih hi a nih rin a ni. Puan tawh angin, nimina Quetta khawpuia police motor pakhat, mi firfiakten bomb hmanga an beihnaah khan, mi 11 vel an thih bakah, mi dang 20 vel an hliam a, he pawi khawihna hi ISIS nena inzawm, tualchhung mi firfiak pawlte leh, Jamaat-ul-Ahrar mi firfiakte chuan an tihah an chhal a ni.
—–

Bangladesh-ah motor chesualah mi 16 an thi. Police-te sawi danin, tukin dar 5:30 vel khan Rangpur district-a lamlianah cement phur truck pakhat chu kawng thlangah a tlan liam a, truck-ah hian Dhaka-a thawmhnaw siam chhuahna hmunpuia thawk mi eng emawzat an chuang a, hnathawkte hi Lalmonirhat district-a Kaliganj khuaa mi an ni. He chetsualna-ah hian a hmunah mi 11  an thi nghal a, mi dang 5 chu damdawi in panpui an nih laiin an thi a ni. Hnathawkte hian truck hi Dhaka atanga Rangpur kal nan an hmang nia hriat a ni bawk.
—–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken