RAM PAWN CHANCHIN THAR

US President, Donald Trump-a’n vawiin khan ven himna nasa tak hnuaiah Saudi Arabia atangin Israel a thleng. President Trump hi Israel President, Reuven Rivlin leh PM, Benjamin Netanyahu bakah Israel-a US palai atana ruat thar, David Friedman-a’n an lo dawngsawng a, ram pahnih President-te hian helicopter-in Jerusalem an pan nghal a ni. President Trump hian PM Netanyahu nena zanriah kil dun pahin Palestinian leh Israel mite inkara remna leh muanna a awm theihna tur inbiakna, kum 2014 atanga chhunzawm tawh loh chu tihthar leh dan tur a sawipui ang. President Trump-a’n Israel a thlen hma lawka a ngen angin Israel hian Palestinian-te hamthatna tur ruahmanna leh ramri kan phalna hmunte siam a nih thu a puang a ni. President Trump-a hian a hmaa mi, Barack Obama ai kha chuan Israel hi a tan zawk hlea ngaih a ni a, Israel-in Palestinian ho luah rama Juda-te tana in a sak chungchangah pawh a nem zawk a, Palestinian hovin an puala an ram dinna tur nia an ngaih, West Bank leh East Jerusalem, Israel-in kum 1967-a a lak huam chhunga hmun 140 velah Juda nuai 6 aia tam an awm tawh a ni. Hei hi khawvel pum ngaihdanah dik lo mah se, Israel chuan a ti lui zel a ni. President Trump-a’n Saudi Arabia atanga thlawhna hmanga Israel a pan hian sawi a hlawh hle a, hei hi ram pahnih inkara thlawhna a thlawh vawi khatna a ni a, tun hmaa US hruaitute pawh kha Jordan ramah an tumĀ  phawt a, Israel an pan leh thin a ni. Saudi Arabia leh Israel ramte hian Iran lakah indo puang ve ve mah se an inthurual lo a, an ram chung zawn boruaka thlawh pawh an inkhap tawn a ni. Puan tawh angin President Trump hi Belgium-a NATO inkhawmpuiah a kal leh ang a, chumi zawh chuan Italy-a G7 intawh khawmnaah a tel leh dawn a ni.

—–

North Korea ramin nimin khan hlawhtling takin missile a en chhin leh a, kar khat chhunga missile a en chhin vawi hnihna a ni. North Korea sawrkar chanchinbu, Korean Central News Agency sawi danin, nimina missile a en chhin, Pukguksong-2 hi hlawhtling taka kah chhuah a ni a, he missile hi km 560-a sang leh km 500 vela hla a thlawk a ni. A hmunah North Korea ram hruaitu, Kim Jong Un-a pawh a awm ve a, missile hi duhthusam anga a thawh avangin a hlawma siam chhuah theih a nih tawh thu a sawi nia tarlan a ni bawk. South Korea sipaite chuan he missile thar hian North Korea hmasawn tawhzia a tilang niin an sawi a, mahse missile-in vansanga a thlen chhoh hnua a lo kir lehna lam thunun dan hi North Korea hian a thiam tawk tawh em tih erawh chu zir chian a la ngai niin an sawi. Mi thiam thenkhat chuan North Korea hian kum 2030 hnu lamah chauh hetiang thiamna hi a neih theih an ring a, KCNA erawh chuan kar hmasa-a North Korea missile kah chhuah khan US-a Hawaii thliarkar leh state lian ber, Alaska pawh a thleng phak tawh niin a sawi a ni.
—–

Vawiin khan Thailand khawpui, Bangkok-a damdawi in pakhatah bomb tihpuah a ni a, mi 24 vel an hliam. Bangkok police-te sawi danin, King Monkut hospital-a thil puak hi bomb ni ngeiin an hria a, bomb siamna hnuhma pawh an hmu a, bomb hi sipai bang ho awmna pindan atanga tihpuah a ni a, hliam zinga mi 3 vel chu an ngaihtuahawm lo nia hriat a ni bawk. Vawiin hi Thailand sipaiten sawrkar paihthlak tuma beihpui an thlak champha vawi 3-na a ni a, puan tawh angin, kum 2014 May ni 22 khan Thailand PM, khatih laia sipai hotu, General Prayuth Chan-ocha-a chuan Yingluck Shinawatra-i kaihhruai sawrkar chu sipai chakna hmangin a paih thla a ni.
—–

Iran-in a lo vau lawk tawh angin nimin khan Pakistan ramri bula awm, Balochistan-a Chaghai bial an ralsai. Puan tawh angin kar kal ta khan Iran sipai hotu, Major General Mohammad Baqeri chuan Sunni muslim mi firfiak pawlte’n Pakistan ramri dep atanga Iran ram chhunga tharum an thawh thin chungchangah Pakistan sawrkar-in a tih tur a tih loh chuan ramri pelin an che tawh dawn tih a lo sawi tawh a, hemi hnu hian Iran Foreign Minister, Mohammad javad Zarif chuan PM, Nawaz Sharif hmuin, ramri ven kawnga tan lak a tul thu a lo hrilh tawh bawk a, Pakistan sawrkar-in ramri sipai dah belh a nih tur thu a sawi hnuah, Iran sipaite chuan mortar hmangin mi firfiak pawlte awmna nia rinhlelh hmunte an bei ta a ni. Ram pahnihte hi tun hma pawhin an lo intibuai fo tawh thin a, kum 2014 pawh khan Iran hian Pakistan-a inkhuar, Jaish-al-Adl mi firfiak pawlte ruk bo, sipai panga chhanchhuak turin sipai tirh a lo tum tawh a, hei hi Pakistan chuan khawvel ram hrang hrangte dan ding lai kalh a nih thu leh ramri kan tum sipaite a lo beih let tur thu-in a lo chhang tawh a ni.

——

US chanchinbu lar, New York Times-in CIA hnathawk 20 vel that-ah leh tan ina khungah China sawrkar a puh chungchangah, China sawrkar chanchinbu, Global Times-in an sawrkar thiltih chu fakawm a tih thu a sawi. Inrinni khan New York Times chanchinbu chuan kum 2010 leh 2012 inkar chhunga US CIA hnena China sawrkar-a thil thleng hrilh chhawng thintu engemaw zat chu China sawrkarin a tihlum niin a tarlang a, Global Times chanchinbu chuan hei hi thudik a nih chuan, China-in US a hneh tihna angah a ngai a, China sawrkar hnenah lawmthu sawi a ba tih sawiin, China sawrkar enthlatu, CIA hnathawk-te chu an hlawhchham bakah, US sawrkarin engmah a hriatpui lo tihna niin a sawi bawk.
—–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken