RAM CHHUNG CHANCHIN THAR

Union Finance Minister, Arun Jaitley-a’n Delhi CM, Arvind Kejriwal lakah intihhmingchhiat tumna thubuai dang a thehlut leh a, he thubuai hi Kejriwal-a ukil-in court hma-a “mi dukdak lo” tia a koh avanga thehlut a nih thu leh, zangnadawmna cheng vbc 10 a phut thu a sawi a ni. Nilaini khan Kejriwal-a ukil, Ram Jethmalani chuan Arun Jaitley chu mi dukdak lo nia sawiin, hei hi a finfiah tur thu a sawi a, a tawngkam hi Pu Jaitley chuan mawi lo a tih thu sawiin, amah ruaitute thu anga hmang a nih leh nih loh a zawt a, kum 93 mi, Jethmalani chuan amah ruaitute hriatpuina-a he tawngkam hi hmang a nih thu chhinchhiah turin court chu a hrilh a ni. Delhi High Court pawhin ukil tawngkam hi tha lo an tih thu sawiin, a ruaitu, Arvind Kejriwal hian a sawifiah tur a ni a ti a, he thubuai ngaihtuahtu, Justice Manmohan chuan a remtihna-a ukil hian hetiang tawngkam a hmang a nih chuan, amah ngei hi court hma-ah a inlan ve tur a ni a ti bawk. He thubuai thar hi Arun Jaitley-a’n Delhi CM, Arvind Kejriwal leh Aam Aadmi party hruaitu dang 5 laka intihhmingchhiat tumna thubuai a siam tawh nen a hrana ngaihtuah a ni ang a, naktukah Delhi High Court-ah ngaihtuah a nih rin a ni. Kejriwal-a leh AAP hruaitu dangte hian thubuai dang an nei nual a, a ukil, Jethamalani-a rawih man hi a san lutuk avangin titi pawh a titam hle a,  Jethmalani chuan Kejriwal-a lakah hian engmah a phut loh tur thu a sawi a ni.
————
-

Japan sawrkar-in Manipur-a Bishenpur district-ah indona lam thil pho chhuahna, War Musuem siam a tum thu, India rama a palai, Kenji Hiramatsu-a’n a sawi a, hei hi hi state CM, Biren Singh pawhin a pawm thu leh he museum dinna atan hian kawng engkimah Japan sawrkar chu an thlawp tur thu a sawi a ni. He War Museum din tumna hmun, Maibam Lokpa Ching-ah hian India Peace Memorial din a lo ni tawh a, he hmunah hian Inrinni khan Imphal-a indo hriatrengna inkhawm, tum 73-na hman a ni a, a hmanpuitu, Pu Hiramatsu chuan he indonaa Japan sipai thi tate hriatrenga hmunah parthi a dah a, Manipur leh Nagaland-a Japan sipai thi tate ruang leh ruhro zawn chhuah kawngah mipuite puihna a ngen bakah, hmuh chhuah tawh awm nual mah se, a tam zawk la hmuh chhuah loh a nih thu a sawi a, state pahnih atang hian Japan rama zin turin mi 25 thlan an nih tur thu leh, lehkha zir duhte tan November thla khian seminar buatsaih a nih tur thu a sawi bawk a ni. Indopui pahnihna laia Kohima leh Imphal inchuha British sipai leh Japan sipaite inbeihna kha indona rapthlak berte zinga mi nia sawi hial a ni thin a, Manipur-ah hian Japan sipai 70,000 vel an thi nia sawi a ni a, an chhungte pawhin hun pawimawhah he hmun hi an lo tlawh fo tawh thin a ni.

———–

Supreme Court-in kum 2011-a Manipura kah hlum, tlangval pakhat nu leh pate thu thehluh chungchanga sawi tur an neihte sawi turin sorkar laipui leh state sorkar a hriattir a, Irom Roger-a kap hlumtu hi tuna state CM, N. Biren Singh-a fapa, Ajay Meetai a ni a, tlangval nu leh pate hian kut an tuar an hlauhthawn thu, court sang ber hi an hrilh a ni. Supreme Court vacation bench, Justice L Nageswara Rao leh Navin Sinha-a awmna chuan Union Home Secretary leh Manipur Chief Secretary chu tun thla ni 29 aia tlai lovah he thu, Irom Roger-a nu, Irom Chitra Devi-i thehluh hi chhang turin a ti a ni. Tuna CM, N. Biren Singh-a fapa, Ajay Meetai-a hi kum nga tang tura tih a ni a, kum 2011 March ni 20 khan Irom Roger-a hi a kap hlum a ni. Lamlianah Irom Roger-a motor hi a hnunga tlan, Ajay Meetai-a hian lehpelh a tum a, ani hian kawng a lo kian mai bik lova, Meetai-a hian a kap ta a ni. Tunah tualthattu, Meetai-a pa hi state CM a nih tak avangin a nu leh pate chuan him loh an hlau ta nia hriat a ni a,  Ajay Meetai-a thiam loh chantirna chungchang, High Court-a ngaihtuah mekah pawh  Irom Roger-a nu leh pa aiawh hian ukil tumah an ding duh lo nia hriat a ni.
———-

Inrinni zan khan Guwahati-a mikhual thlenna hmun pakhat atangin Assam police hnuaia Bureau of Investigation (Economic Offences) miten pawisa note thi tawh, Rs 500 leh Rs 1,000 note, cheng nuai 95 hu an man a, mi pathum an man bawk. An thu dawn bawhzuiin BIEO mite hian SP, Shyamal-a hovin Guwahati, Six-mile bula Brahmaputra Lodge chu an dap a, he hmuna lo thleng mekte hnen atangin pawisa note thi tawh hi an man ta a ni. An mi mante hian za zela 23 hlawh turin pawisa note hlui hi thleng atan an keng niin an sawi a,  Guwahati-a sumdawng pakhat, Nirmal Sarma-a’n pawisa hi thleng a tiam niin an sawi bawk a ni.
———–

Tami Nadu Law Minister, C V Shanmugam-a’n state CM hlui, O Panneerselvam chu CM nih a duh avanga Pi Jayalalithaa-i thatah a puh a, hei hian titi a titam thar hle a ni. Vantlang inkhawmah Law Minister chuan, Jayalalithaa-i a thih khan Pannerselvam-a hi CM a ni ta reng a, a thih hnu thla hnih thlengin CM a ni zui a, Jayalalithaa-i thih dan kha chhui zui ni sela chuan, Panneerselvam-a thiltih dan hi chhui hmasak ber tur a ni, a ti a, amah hi CM nih duh lutuk avanga Jayalalithaa thatah an puh thu sawiin, rinhlelhna pawh a zual zel niin a sawi. AIADMK, O Panneerselvam-a lam hian Jayalalithaa-i thih dan hi chhui an phut mek a, AIADMK peng pahnih inchhun finna atan pawh hei hi an phut hmasak zingah a tel a, a lehlam, Edappadi Palaniswami-a kaihhruaite erawh chuan he thihna chungchangah hian Madras High Courtah PIL a awm mek tih sawiin, High court-in CBI chhuitirna tur thupek a siam chuan chhuitir a nih tur a ni ang, an ti a, Pannerselvam-a CM a nih chhung zawng khan engatinge an chhui si loh, tih an zawt bawk a ni.
————

Union Coal Secy hlui, company pakhat hnena lungalhthei khur pek chungchanga thiam loh chantir, H C Gupta-a thawhpui leh a thian thate chuan, court thuchhuak hi dan hmanga khin let a nih theih dan tur buaipui turin Pu Gupta hi an nawr mek a, amah hi officer dik leh thianghlim tak nia an sawi avang leh, a kaihhruai Committee thu tlukna avanga mimala inhrem chu dik lo an tih avangin, khin let ngei tul an hria a ni. Pu H C Gupta chuan hemi chungchangah hian engmah a la sawi lova, khing buai lova court thuchhuak apiang chu hlen chhuah mai a duh zawk niin an sawi. Nikum August thlaah pawh khan Pu Gupta hian a ukilte pawh hnuh kir a, court thuchhuak ang ang chu lung in atanga lo ngaihthlak mai pawh a duh thu, court hi a hrilh tawh a, court chuan hei hi ngaihtuah nawn leh tura ngenin, ukil rawihna lamah harsatna a tawk a nih pawhin, a thlawna a rawih theih dan tur ngaihtuahsak hial pawh a tiam a ni. Pu HC Gupta-a thawhpui leh a thiante chuan, sorkar committee thuchhuak, mimala hlawkpuina engmah awm lo thilah pawh Committee kaihruaitu Officer te hrem chu dik lo an tih thu an sawi a, puan tawh angin Pu Gupta leh khatih laia Coal Joint Secy, tuna Meghalaya Chief Secy, K S Kropha leh Director, K C Samaria chu CBI court-in Kamal Sponge Steel and Power Ltd hnena Madhya Pradesh-a lungalhthei khur pek chungchangah thiam loh a chantir a ni.
—————

India mi tlang lawn mi, Ravi Kumar-a, khawvela tlang sang ber, Mount Everest a lawn chhuah hnua a chin hriat loha bo ruang chu vawiin khan hmuh a ni. Ravi Kumar-a ruang hi darkar 24 an zawn hnuah, Mt. Everest-a lawnte’n an zawh thin kawng atanga meter 200 vela thukah hmuh a ni a, a ruang hi lak chhuah theih a nih loh avangin chhinchhiahna an siam hnuah, an kalsan leh a ni. Ravi Kumar hi Uttar Pradesh, Moradabad khuaa mi ani a, Inrinni khan Mt. Everest chhip hi a thlen hnu, a chhuk leh lamah hian a hruaitu, Sherpa nen an nuamsam lo ve ve a, ani hi a chesual ta a, a hruaitu pawh hian harsa takin camp a thleng thei hram niin Arun Treks Managing Director, Chhewang Sherpa chuan a sawi. Kar kal ta tawpa Mt. Everest lawn dang mi pathum, US, Slovakia leh Australia mite pawh nimin khan an tlang lawnna-ah an thi bawk a ni.

Hetih lai hian Arunachal Pradesh-a Bomdilla khaw mi, Anshu Jamsenpa-i chu hmeichhiate zingah ni nga chhunga Mount Everest vawi hnih lawn chhuak hmasa ber a ni a, kum 2012 khan Nepal mi, Chhurim Sherpa-i chuan chawlhkar khat chhungin Mt. Everest hi vawi hnih a lo lawn chhuak tawh a, hei hi a khum ta a ni. Kum 37 mi, Anshu Jamsenpa-i hi India hmeichhiate zingah Mt. Everest vawi nga lawn chhuak hmasa ber a ni bawk a, amah hi fa pahnih nei tawh a ni a, nimin zing dar 7:45 khan a lawn chhuak leh a ni. A pasal, Tsering Wange chu Arunachal Mountaineering and Adventure Sports Association President a ni.
————–

Nimin khan Madhya Pradesh-a police station-ah naupang 50 chuang hren an ni. Madhya Pradesh police-te chuan heng naupang-te hi an chuanna rel atanga hruai chhuakin, police station-ah dar kar engemawzat an hreng a, naupang ho hruaitu, mi 7 pawh police-te hian hreng nghalin, nizan zanlai pelh thleng khan thu an zawtfiah a, naupangte hi heng mi 7-te hian sakhaw danga leh an tum nia sawi a ni. Police-te sawi danin, heng naupang-te hi Kristian an ni tih an hre chhuak tawh a, Gujarat-a Meghnagar khua atangin Maharsatra-a Nagpur khawpuiah inkhawm chhim tura kal an ni a, an vai hian kum 12 hnuai lam mi vek an ni a, tunah chuan naupang enkawlna hmunah an awm mek nia hriat a ni.
—–

Nimin kha PM hlui, Rajiv Gandhi-a thih champhaphak vawi 26-na a ni a, hemi pual hian Congress party chuan state Assembly leh Parliament-ah hmeichhia-te tana seat tam zawk hauhna tur bill pawm a nih theih nan campaign a buatsaih,  He bill hi state assembly leh Parliament-a hmeichhia-te tana seat zaah 33 hauhna tura duan a ni a, kum 1996 khan Lok Sabha-ah put luh a lo ni tawh a, kum 2010 khan pawm ni mah se, tun thleng hian bawhzui lohin a la awm a ni. Congress President, Pi Sonia Gandhi-i chuan ram pum huap campaign hi Rajiv Gandhi-a thlan, Veer Bhoomi-ah a hawng a, Rajiv Gandhi-a piancham, August ni 20 thlenga chhunzawm a ni ang a, Congress hian BJP kaihhruai sawrkar chu he bill hi pawm turin an phut dawn a ni. BJP hruaitu, Shaina NC chuan Congress thil tih hi thil àwm lo tak nia sawiin, Congress sawrkar chhung zawng khan bill hi an ngaihsak lo niin a sawi a, tuna taka hetia an rawn buaipui thar leh hi mak a tih thu a sawi bawk.
——

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken