RAM CHHUNG CHANCHIN THAR

Sikkim CM, Pawan Kumar Chamling-a’n West Bengal sât thlaa Gorkhaland state thar siam phûtna chu a thlawp thu a sawi a, West Bengal sorkar a lungawi lo hle nia hriat a ni. West Bengal Parliamentary Affairs Minister, Partha Chatterjee chuan Pu Chamling-a thusawi chungchangah hian an lungawi loh thu leh Sikkim CM thusawi hi an dodal thu, Union Home Minister, Rajnath Singh hnenah ziakin a thawn a, an buaina-ah hian a rang thei ang bera inrawlh turin Union Home Ministry chu a ngen rualin, an state chhung buaina-a state dang lo inrawlh tumna chu khap turin a ngen bawk a, tun thla ni 8 hnua an state-a tharum thawhna thlengte leh Darjeeling leh a chhehvela boruak awm dan kimchang pawh a lehkha-ah hian a ziak bawk a ni. Sikkim CM hian Pu Rajnath Singh-a hnenah hian tlangrama chengte’n an phut anga Gorkhaland state siam a nih chuan helai bialah hian remna a awm thei dawn niin a sawi a, ram pum tan pawh hlawkna nasa zawk a thlen theih a beisei thu, ziakin a thawn a ni. Pu Chamling-a chuan, Gorkha mipuite thil phût hi ram danpui huang chhunga mi a nih thu sawiin, Gorkha miten ram an hmangaihna thûkzia pawh mi tin hriat a ni, a ti a, Ningani khan Sikkim-a rorel lai pawl, SDF chuan hemi chungchangah hian resolution an pass a, an thutkhawmna hi Pu Chamling-a hian a kaihruai a ni. 
———

Tuna Gorkhaland phût nana buaina chhuak meka a bul tumtu ber, Gorkha Janmukti Morcha hruaitu, Bimal Gurung-a chuan Gorkhaland hi siam thuai a nih loh chuan mi za tam tak an thi ngei dawn niin a sawi a, West Bengal sorkarin an nupaa tualthah thubuai a siamsak avanga an bihruk hnuah nimin khan Pu Bimal Gurung-a hian thuthar lakhawmtu pakhat kawmin, mipui thlawpna nen Gorkhaland siam phûta sorkar nawrna hi a kaihhruai zel tur thu a sawi. West Bengal sorkar chu tharum thawh leh invau ching nia sawiin, internet leh chanchin thar puanna TV channel-te pawh a titawp niin a sawi a, khawiah mah a tlanbo lo niin a sawi bawk.
———

PM, Narendra Modi chu ram pathum tlawh turin vawiin khan a zin chhuak a, Portugal, United States leh Netherlands ramte a tlawh ang. Pu Modi-a chuan a tlawh tur ram pathumte nen hian thawhhona tha zawk siam a tum thu a lo sawi tawh a, United States a tlawh tur pawh hi President Donald Trump-a sawmna chhanna a nih thu leh, zanriah a kilpui tur thu a sawi bawk a ni. White House hotute chuan Pu Modi-a an mikhual tur hi an tan pawh hun pawimawh a nih thu leh, President Trump-a sorkarna hnuaia ram dang hruaitu, White House-a zanriah ei hmasa ber a nih dawn avangin a ropui thei ang bera lo lawm an tum thu an sawi a ni.

—–

President thlanna tura NDA candidate, Ram Nath Kovind-a chuan naktûk atangin ram chhunga state hrang hrang tlawhin, amah vote turin vote neite a sawm dawn a, Uttar Pradesh a tlawh hmasa ber ang. Bihar Governor hlui, Pu Kovind-a hi UP-ah hian Union minister, Nitin Gadkari-a’n a tawiawm dawn a, state lian deuh a tlawh kual phawt dawn a ni. Puan tawh angin, President thlannaah hian Lok Sabha leh Rajya Sabha member-te leh state MLA-ten vote an nei a, vote awm zawng zawng hi 10,98,882 a ni a, MP pakhat vote hlut zawng chu 708 a ni a, MLA-te vote hlut zawng erawh chu an awmna state-a mihring awm zat a zirin a inang lo a ni.
———-

President 15-na thlanna tura Congress kaihhruai eptu pawl candidate, Pi Meira Kumar-i chu ram chhunga ven himna pek theih sang ber, Z+ security pek a ni. Pi Kumar-i hi ralthuam keng police ven himna, X security pek thin a ni a, Z+ security hnuaiah chuan National Security Guard commando 10 chuang bakah ralthuam keng police-ten chhun zan zawmin an veng ang a, escort motor leh pilot motor pawh pek a ni ang. Z+ Security hi NDA candidate, Ram Nath Kovind pawh pek a lo ni tawh a, an kalna apiangah vengtute hian an zui zel dawn a ni. Z+ security hi sawrkar mi pawimawh zual tak takte chauh pek thin an ni a, Union Home Minister Rajnath Singh bakah, BJP hruaitu hlun, LK Advani, Uttar Pradesh CM, Yogi Adityanath leh Assam CM,  Sarbananda Sonowal te hi Z+ Security pek zinga a langsar zualte chu an ni.

—–

Parliament fur thutkhawm chu thla leh ni 17 khian tan a ni dawn a, hemi ni hi President inthlan ni atana ruat a ni a, Parliament thutkhawm hi August ni 11 thleng neih a ni ang. Cabinet Committee on Parliamentary Affairs chuan he thutlukna hi a siam nia sawi a ni a, President inthlan lo awm tura NDA candidate, Ram Nath Kovind-a’n nimina a hming a thehluh hnu khan, Union Home Minister, Rajnath Singh-a kaihhruai, CCPA chu thu khawmin, Parliament thutkhawm neih hun tur hi an ngaihtuah a ni. Parliament thutkhawm ni khatna-ah chuan Lok Sabha member, Vinod Khanna leh Rajya Sabha member, Pallavi Reddy-te sun an nih dawn avangin House hi rorel lovin an tin leh rin a ni.
—–

Supreme Court-in lamlian atanga metre 500 china zu zawrh khapna thupek a lo chhuah tawh chu, Punjab-in a peh hêlna tur dan thar a siam ve leh. Puan tawh angin, nikum December ni 15 khan court  sang ber chuan lamlian atanga metre 500 chinah zu zawrh emaw zu fakna lam emaw reng reng tar a khap a, hei hi kawngpui dunga lirthei chesual tihtlem tumna a ni a, state zawng zawngin an zawm mek a ni. Punjab sorkar chuan state excise act chu nimin khan siam tha-in, lamlian hnaiha thingpui dawr thenkhat bakah, club leh hotel-te chu zu hralh phalsak an ni leh dawn a, state sorkar chuan heng hmunte hi TOURISM AND HOSPITALITY dan ding lai tlawhchhanin, a hmuna zu in tur hralh chhuah phalsak an nih tur thu leh, hei hian an state chhungah hna tam tak a siam phah dawn niin a sawi. He dan thar hi State Assembly-ah ngaihtuah tur a la ni a, tunah hi chuan a ruangam duan mek chauh a la ni.

—–

Haryana-a Faridabad district mi, Muslim tleirawl pakhat chu a chuanna rel-ah thah a ni a, a unau dangte pawh sawisak an ni a, na takin an hliam. He thil hi Ningani tlaia thleng kha a ni a, UP-a Mathura khawpui lam pana kal rela chuang, Muslim tleirawl, kum 16 mi, Hafiz Junaid-a leh a unau dang pali-te chu mi dang nen thutna inchuha an inhnial deuh hnuah, rela chuang ve mi dangte nen sakhaw lam thilah an inhnial zui a, hemi hnu hian Junaid-a te thianho hi sawisak rawn an ni a, Junaid-a hi vih hlum a ni. Police-te chuan nimin khan Junaid-a thah a nihnaa inhnamhnawiha rinhlelh mi 1 an man tawh niin an sawi a, thuhretute sawi danin, Junaid-a leh a unaute hi “bawng sa ei ching” leh “ram phatsantu” tia koh nawmnah an ni a, an khabe hmul-te chu tham sakin, hmuhsit takin an tawng khum a, bawngsa kengah an puh bawk nia hriat a ni. Hemi chungchangah hian eptu party-te chuan BJP kaihhruai sorkarin mawh a phur niin an sawi a, sorkar laipui chu Hindu sakhaw labingtute khuahkhirh tha tawk lo-ah puhin, hei hi hnam tenau zawk leh sakhaw dangte’n an tawrh phah ta niin an sawi a ni.
—–

J&K-a police hotu, DSP, Mohammad Ayub Pandith thah a nih chungchang chhuina kal zelah, mi 5 man an ni tawh a, he thubuai chhui tur hian Special Investigation Team din a ni bawk. Puan tawh angin, J&K khawpui Srinagar-a Muslim biak in, Jamia Masjid leh a chhehvel veng tura dah, DSP hi amaha a awm laiin tualchhung mipui 200 atanga 300 inkar velin an khawih rawn a, police officer pakhat sawi danin, hetia mipui thinrimin an bawr luih luih karah hian, Pandith-a hian a pistol pai lai chu loh theih lohna avangin a phawrh a, a thih dawn hnaihah pawh hian tumah a kap hlum duh lo a, amah beitute hi an ke-ah chauh a kap a ni. DGP, SP Vaid-a chuan he thila inhnamhnawiha rinhlelh mi 12 vel an hre tawh niin a sawi a, nizan khan North Srinagar-a police hotu, Sajad Khaliq Bhat chu Pandith-a duty-na hmunah hian sawn a ni.
———–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken