RAM CHHUNG CHANCHIN THAR

Central Information Commission (CIC)-in Political Party-te chu Right to Information Act hmangin party chhunga thil thleng hriat duh neiten thu an zawt fiah thei tawh dawn niin a sawi. Democratic Reforms Assosication hruaitu pahnih- Subhash Agrawal leh  Anil Bairwal-te chuan Political party liante sum hman dan leh party-a sum thawhtute bakah an address kimchang, RTI Act tlawh chhana an zawhna chu party hrang hrang-ten chhang duh loin RTI Act in a huam ve lo angin an insawi tih Central Information Commission (CIC) an hrilh a, party hrang hrang laka an lungawi loh thu an sawi hi Chief Information Commissioner, Satyananda Mishra-a hoa Information Commissioner pahnih- ML Sharma leh Annapurna Dixit-te’n an ngaihtuah hnu-ah, party lian paruk- Congress, BJP, CPI-M, CPI, NCP leh  BSP-te chu Right to Information Act hnuaia awm an nih thu sawiin, tun a\ang chuan party chhunga thil pawimawh hre duh an awm chuan an zawhna chhang tawh turin an hriattir a ni.

Central Information Commission (CIC) hian Party hrang hrang President leh General Secretary-te chu chawlhkar 6 chhung ngei a, RTI Act tlawh chhana thu zawttute lo chhawn tur, public information officer leh thubuai a awm huna buaipui zuitu tur appellate authority ruat thuai turin a hriattir nghal a, RTI Act hmanga thu zawhte chu chawlhkar 4 chhunga chhang ngei turin a hriattir bakah RTI Act inkaihhruaina leh an kalphung hrang hrangte te party website-a tarlang turin a hriattir bawk. Party hrang hrangte khingtu, Bairwal chuan, RTI Act-in a huam party-te hi sawrkar a\anga \anpuina sum dawng an nih bakah mipui tana thawk leh dan kengkawh a siam\hatu an nih avangin RTI Act-in a huam lo anga an insawi hi thil dik lo a ni a ti a, heng party hrang hrang hi anmahni ham\hatna tur uma thil dik lo tam tak ti thei an nih avang te, chhiah chawi lo-a sum tam tak lalut-a sawrkar a\ang pawha sum dawng an nih avangin an sum hman dan leh an kalphung mipui hnena zau zawka puan theih tura a awm a ngai niin a sawi.
—————

Eiruk thubuai avanga bang, Railway Minister, Pawan Kumar Bansal chu vawiin khan CBI-in thu an zawt fiah. Puan tawh \hin angin, Pawan Kumar Bansal hi Railway Minister a nih laiin a tupa, Vijay Singla chuan Railway Board member, Mahesh Kumar-a hnen a\anga thamna, Rs. 90,00,000 lain, hna \ha zawk pek a lo tiam a, Bansal hian a tupa thil tih dik lohah hian inhnamhnawihna engmah a nei lo niin a insawi a, mahse he mi chungchang chhuitu, CBI chuan thamna sum dawngtu, Vijay Singla leh thamna petu, Mahesh Kumar-te chu Delhi-a Pawan Kumar Bansal-a chenna inah pawh an inhmu ni-a sawiin, Kumar leh Bansal-te hi phone pawhin vawi 1,000 chuang an inbia a, hei vang hian  Bansal hi thamna sum lak thubuaiah hian a inrawlh ngei an rin thu an sawi a ni.
—————

Thla hlui ni 25-a Chhattisgarh Congress hruaitute beihna-a tel ve ni-a hriat, Maoist hel pawl hruaitu pakhat, Savita ti-a hriat chu vawiin khan Andhra Pradesh Khammam District-ah man a ni. Andhra Pradesh Police-ten an man, Savita-i hi CPI-Maoist hnuaia Bastar Regional Committee member a nih bakah, Maoist ho rorelna sang, Central Committee member, Chandranana-a nupui a ni a, hel ho pawikhawihna hrang hrangah a inhnamhnawih avangin sipaiten a lu manah Rs. 25,00,000 dahin hun rei tak an lo zawng tawh a, a rual hian CPI-M zawmpui pawl pakhat, Telangana Vidyarthi Vedika member, Prithviraj leh a pa, Dharmaraj te pawh man an ni a, Prithviraj-te pafa hian Savita-i hi Congress hruaitute an beih \uma a hliam enkawl turin damdawi inah hruai an tum niin Police te chuan an sawi.
—————–

US-a luh tum India mi 7 chu Mexico ah man an ni. Mexico Interior Ministry thu chhuah chuan, Chiapas state-a hotel pakhata an man, US-a luh ruk tum-te hi India mi 7 bakah El Salvador mi 5 leh Honduras mi 3 an ni a ti a, heng mite hi an ramah thawn kir an nih dawn leh dawn loh hriat a la ni lo a ni. Mexico ah hian thla khat chhungin US-a luh tum ramdang mi 122 man an ni tawh a, heng zingah hian India mi tam tak awmin, kar kalta pawh khan India mi 30, lehkha pawimawh tel lo-a US-a luh tumte chu Ecatepec khuaah man an lo ni tawh a ni.
—————–

Manipur-ah hel pahnih sipai kutah an inpe a, hengte nen hian kumin chhungin sawrkar kuta hel inpe 50 an chuang tawh a ni. Sipai hotute sawi danin, an ralthuam nena sipai kuta inpe te hi, Kangleipak Communist Party (KCP) mi, Kh Tombi leh hel pawl dang, Kanglei Yawol Kann Lup (KYKL) mi, S Rakesh-te an ni a, Kh Tombi hian kum 2005 khan hel pawl zawmin, Myanmar-a Tamu Camp ah ral beih dan a zir \hin a, an pahnih hian an silai, revolver pakhat ve ve kengin sipai kutah an inpe a ni. Sipai kuta hel an inpek lai hian Ukhrul district-a police station pakhat chu hel hoin bomb-in an bei a, bomb puak hi a chak viau nain thi leh hliam erawh chu an awm lo ni-a sawi a ni a, he pawikhawihna hi eng pawl mahin an tihah an chhal lo na in, helai bial hi Naga hel pawl NSCN mite chet tlat tamna hmun a nih avangin tun \uma pawikhawihna pawh sawrkar nena inrem duh lo hel ho tih a nih rin a ni.
—————

Bihar MLA hlui pahnih- RK Rana leh Dhruv Bhagat chu kum 1995 November thla leh kum 1996 January thla inkara dik lo taka sawrkar sum la chhuaka puhna thubuaiah thiam loh chantir an ni a, kum 5 tang tura tih an ni. Bihar-a Animal Husbandry department hman tur sum tihchingpen thubuai hi CBI-in a chhui mek a, Godda treasury a\anga sawrkar sum. Rs. 37,00,000 l^k chhuah thubuaiah Department hotu pahnih- Om Prakash Diwakar leh Ajit Kumar Sinha-te chu kum 6 tang turin CBI Court chuan a lo hrem tawh a, an ni bakah hian ranchaw supply tu pakhat leh Treasury-a thawk mi panga pawh tang tura tih niin vawiin khan  CBI judge Sitaram Prasad chuan he thubuaiah inhnamhnawih-a puh, Public Accounts Committee Chairman hlui leh BJP MLA ni \hin, Dhruv Bhagat leh RJD MLA leh Parliament member pawh lo ni tawh, RK Rana-te chu thiam loh chantir ve lehin kum 5 tang turin a ti a ni.
—————–

Khualzin phur, Air India thlawhna-a thawk, Bhavik Shah chu cigarette bawm 50 a ken avangin London police-te’n an man a, a hna a\anga chawlh tir nghal a ni. Mumbai a\anga London pana thlawk khualzin phur thlawhna-a chuang, Bhavik Shah hi Heathrow  \umhmun an thlen hnua Police-ten a thawmhnaw dahna an enfiahna-ah cigarette bawm 50 a pai tih hmuh a ni a, heng hi a ta ngei tih a puan hnuah Police ten darkar 8 hreng zuiin Pound 5,000 an chawi tir hnuah an chhuah a, he thil thleng avang hian a hna a\anga chawlh lailawk tir nghal a ni.
————–

Lemchan thiam, Jiah Khan chu Mumbai-a a chenna inah inawkhlum-a hmuh a ni. Kum 25 mi, Jiah Khan-i ruang hi nizan dar 11 khan a nu-in a pindanah a hmu a, lehkha hnutchhiah engmah a neih loh avangin, phone-a biak hnuhnun ber, a bialpa, Suraj Pancholi chu Police ten thuzawh fiah turin an la tawh a, an awmpuite leh an in vengtu bakah an \henawm hnaite pawh thu zawh fiah an ni dawn niin Police ten an sawi.
—————

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken