RAM PAWN CHANCHIN THAR

Iran sum leh pai dinhmun tichhe turin a pawisa, Rial hlutna tihhniam a ni dawn niin US in a sawi. Nuclear ralthuam siama puh a nih avanga ram hrang hrangin an hrek mek, Iran hian nuclear ralthuam a siam lo tih finfiah a la nih loh avangin America sawrkar chuan na zawka hrek a remti niin White House Press Secretary, Jay Carney chuan a sawi a, an hrek dan tur an duan thar chu President Barack Obama pawhin a pawm tawh ni-a sawiin, nuclear raltuam siam lo tura an nawr reng Iran sawrkar hian ramdang nena inremna zawnga inbiakna pawh a zawm duh lo a, hun \ha tam tak a liam tawh avangin a chunga thil thleng chu a pawm mai a ngai tawh niin a sawi a, an hrekna a ngai pawimawh lo zui zel a nih chuan tun aia na zawka hrek an hnial lo niin a sawi.US-in Iran a hrekna turah hian a sum leh pai dinhmun tihchhiat chu a tum  ber a ni a, kum 2012 a\anga na zawka an hrek hnuah Iran pawisa hlutna chu a zahve dawn laiin a tlahniam tawh a, mahse tun \uma an hrekna tur-ah hian ramdanga Iran pawisa tamna bank leh sumdawnna hmunte chu Iran pawisa, Rial dawng lo tura tih an nih dawn avangin Iran sawrkar chuan US-in a hrekna hi a tuar hle rin a ni. US hian Iran pawisa hlutna tih danglam tuma ruahmanna a siam bakah, Iran rama lirthei siamchhuahna hmunte chu a hrek tel dawn a, an hmanraw mamawhte chu ramdang a\anga an dawn theih dawn loh bakah hralh chhuah khapsak an nih dawn avangin sawrkar sum hmuhna hnar \ha tak chu a pin mai rin a ni a, heng bakah hian US-in Iran a lo hrek tawhna ngaipawimawh lo ramdang company-te chu na taka hrem an ni ve dawn a ni. US hian Iran a\anga tuialhthei thawn chhuahna pawh a lo dang tawh a, a sum hnar \ha tak, lirthei siamna hmanrua thawn chhuah leh hralh a khap sak leh dawn avang hian Iran ram sum dinhmun pawh a chhiat phah hle rin a ni.
—————

Afghanistan ram khawthlang lam, Farah Province-a chil puah bomb puakah pa pakhat leh a fate 3 an thi. Sawrkar thu puangtu, Abdul Rahman-a sawi danin, vanduaina-a thi chhungkaw pakhat hian lamliana chil puah bomb inphum chu an chil niin a sawi a, bomb puakah hian an nu pawh na takin a hliam ni-a sawiin, he chil puah bomb hi tute kam nge a nih an la hre lo a ni. UN chuan Afghanistan ah hian tun hnai chawlhkar 2 chhungin pawikhawihna hrang hrangah civil mi thi leh hliam 412 an awm tawh niin a sawi a, nikum nena khaikhinin kumin a pawikhawihna tuartu civil mi punna hi za-a 24 lai a ni tawh a, heng pawikhawihna hrang hrang zinga za-a 84 chu mi firfiakte tih niin a sawi bawk.
—————-

China sawrkar chuan mi tam tak thihna, kum 1989 June 4-a Beijing khawpuia China sawrkar duh lohna lantira zirlai pungkhawmte leh police-te inbeihna ni champha hriatrengna puala hun hman a khap a, buaina-a thite hriatrengna hmun siam pawh tlawh pawh theih lohin a khar. Kum 24 kalta a, Beijing khawpuia kawtthler zau tak, Tiananmen Square-a mipui lungawi lo pungkhawmte police leh sipaiten-te’n an beihna hi China rama mihring dikna leh chanvo palzuta sawrkar pawikhawihna sawi hlawh ber zinga mi a ni a, he ni thlen champha-ah hian mi tam takin buaina-a thi an chhungte phumna hmun, Beijing khawthlang lama Wanan thlan chu an tlawh \hin a, kuminah erawh chuan he thlan hi sawrkarin tlawh pawh theih loha kharin, a luhna turah pawh sipai tam tak a dah a, hei bakah hian Tiananmen Square-ah pawh mipui chetla thlithlai tur Police tam tak dah an ni bawk a, sawrkar chuan kha thil thleng kha sawi chhuah a khap avangin Police tam tak civil mi anga inthuamte pawh kawthhlerah mipui titi ngaithla-a dan bawhchhiate hrem turin dah an ni. Tiananmen Square-a buainaah hian thi zat hriat chian a ni lo a, mahse buaina avanga man, an chanchin hriat zui tawh lohte nen chuan mi 3,000 an chuang niin buaina-a thi chhungte inzawmkhawm pawl, Tiananmen Mothers chuan an sawi.
——————

Europe khawmualpui ram laili-a ruah sur nasa vanga thi chu mi 9 an tling tawh a, a tuar nasa ber, Czech Republic-ah chuan tui chim chin sang zel avangin ram pumah emergency puan a ni. Czech Republic-ah chuan ruahsur vang hian mi 7 an thi tawh a, lui tui chim chin a san zel avangin an ram chhim lama tuikhuahte chu a chhiat mai hlauin, sawrkar thupek angin sah an ni tawh a, tuikhuah sah a nih avang hian chhiatna lian tham thleng thei veng turin an khawpui, Prague-ah pawh tuilian ven nan thirin a danna siam a ni tawh a ni. Austria ah chuan ruah sur nasa vang hian mi 2 an thi tawh a, Germany ah pawh tuilian hian zual lam a pan zel a, Bavaria lui kama Passau khua chu kum zabi 16 hnu-a tuiin a chim san ber \um a ni. Slovakia PM, Robert Fico chuan an ram \henawma ruah sur nasa vanga tuilian hian an ramah pawh chhiatna a thlen thei dawn ni-a an hriat avangin harsatna thleng thei laka inven tumin theihtawp an chhuah mek niin a sawi a, Hungary ram National Disaster Authority hotu, Gyorgy Bakondi pawhin Danube lui lian avangin an khawpui Budapest-a tuilian veng turin mi 400 velin theihtawp chhuahin hna an thawk mek niin a sawi.
—————-

UN-in Syria ram tualchhung buainaah mi tam tak suat theihna ralthuam \ha lo hman a ni ngei niin a sawi. Syria ram buaina zirchiang tura din, UN Inquiry Commission report-in a tarlan danin, Syria sawrkar paihthlak tumtu eptute leh sawrkar sipaite inbeihnaah pawl pahnihin indona-a hman khap tawh, damdawi hlauhawm an hmang ngei a, kumin March leh April thla pawh khan heng ralthuam hlauhawm hi \um 4 lai hman niin he buainaah hian UN in inkaihhruaina dan a siam te bawhchhiat a nih bakah mihring dikna leh chanvo palzut zawnga pawikhawihna tam tak a thleng tawh niin a sawi bawk. UN hian buaina a ralthuam hlauhawm hman a nih leh nih loh chiang taka enfiahtu tur, damdawi lam thiamte Syria rama an luh ngei phalsak turin Syria sawrkar a ph<t a, buainaah hian ralthuam hlauhawm hi hman a ni ngei tih finfiah ni tawh mahse, sipai leh eptute ralthuam hman hi enge a nih finfiah a la ni lo niin a sawi.
—————

Palestinian Authority President, Mahmoud Abbas-a’n PM thar atan West Bank University President ni lai, Rami Hamdallah a ruat. Palestinian PM a nihna a\anga kumin April thla laihawla bang, Salam Fayyad-a thlaktu tur, kum 54 mi, Rami Hamdallah hi Britain rama Lancaster University a\anga doctorate degree nei a ni a,  Politics-ah dai hriat la nei lo anga sawi a ni nain, Mahmoud Abbas-a  kaihhruai Fatah-ah th<k taka inhnamhnawih tawh nia sawi a ni. Palestinian-te chenna Gaza biala roreltu, Hamas thupuangtu, Sami Abu Zuhri chuan West Bank-a sawrkar thar siam tura PM ruat a ni chu dan kalh nia sawiin, President  Mahmoud Abbas-a chu ram inpumkhatna tur kawng dang luiah a puh a ni. Palestinian ho hi pawl pahnih rorelna hnuaiah an awm a, Gaza-ah Hamas ho-in ro an rel a, West Bank-ah Palestinian Authority-in ro an rel thung a, thla hlui khan pawl pahnih hruaitute hi Cairo-ah inbiain, rorelna pakhat hnuaia Palestinian mite an awm theih nan thla 3 chhunga sawrkar in\awm siam an remti a, an inremna hi tihpuitlin a nih dawn leh dawn loh erawh chu hriat a la ni lo a ni.
————-

Taiwan President hlui, eiruk thubuai vanga tang mek, Chen Shui-bian chu a tanna hmunah intihhlum a tum lai hmuh a ni a, tang vengtuten an chhanchhuak hman niin an ram Justice Ministry thu chhuahin a sawi. Kum 2000 a\anga 2008 chhunga Taiwan President, Chen Shui-bian hi eiru a puhna thubuaiah thiam loh chantir a nih avangin Taiwan khawpuia Taichung tan inah a tang mek a, nizan khan bual pindanah hruk puan hmanga inawh hlum a tum lai chu tang vengtuten chhan chhuakin, enkawl zui nghal a ni a, a dinhmun a ngaihtuahawm tawh lo ni a sawi a ni.
—————-

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken