www.zonet.in

RAM PAWN CHANCHIN THAR

US President thar thlan hun chu ni hnih chauhvin a dang ta a, candidate pahnih leh an lamtangte pawhin theihtawp takmeuh an chhuah mek a ni. California Governor, Arnold Schwarzenegger pawhin Ohio-ah Republican candidate, John McCain campaign puiin thu a sawi a, Mc Cain chu ram tana thawkrim, entawn tlak a nih thu sawiin, a khingpui, Barack Obama-a’n US Senate member ni-a hun a hman chhung aia rei, America ram tan Vietnam ram lung inah a tang tawh tih a sawi. Hetih hian hian Obama pawhin Republican lam tamna nia a ngaihte a hrut kual zel a, John Mc Cain-a te state, Arizona bakah Georgia leh North Dakota state-ah te pawh beihpui a thlak mek a ni. Obama campaign hlapui pakhat chu, kum 72 mi, Mc Cain thlan tlin a nih chuan, America ramah a tha zawnga hmasawnna thar beisei tur a awm lo, tih a ni a, tuna sorkar ding lai chhunzawmna satliah ang lek a ni dawn niin a sawi. Republican mi langsar, Secy. of State, Gen.Colin Powell pawhin amah chu President atan an pawm tih sawiin Obama chuan, Republican mi tam takin amah chu an vote dawn niin a sawi a ni. Mipui ngaihdan lakna hnuhnungah chuan Obama hi la  tha hret zawk mah se, Mc Cain hian a hnaih sawt hle a, CNN/Time/Opinion Research poll-ah phei chuan Republican lam hi point 5-in an sang tawh a ni. Vice-President hlui, Al Gore pawh Obama tanm hian Florida-ah a campaign mek a, a che tha zawk tur hriat hleih theih a la ni lo a ni. John Mc Cain chuan he inthlanah hian hnehtu ni ngei dawnin a insawi a, Democrat Barack Obama a chak zawk dawn nia hrilh lawktute chuan result mak tak an hmu dawn niin a sawi. Candidate pahnih hi kumah an inthlau hle a, pakhat kum 72 a ni a, pakhat chu kum 47 chauh a la ni.

Libya chuan a firfiaka chetna tuartute zang na dawm nan US compensation fund-ah dollar tld. 1 leh vbc. tak 5 a chhung lut tih US State Deptt.-in a sawi a, he sum hi court-a inkhinna, la chin fel loh chin fel a nih theih nana August thlaa inremna an siam angin chhun luh a ni. Kum 1988-a Lockerbie-a bomb puak, mi 270-in an thih phah leh kum 1986-a Berlin dosco-a pawi khawihna, mi 3 in an thih phah leh mi dang 200 chuang hliamna thlentu avangin he zangnadawmna sum hi pek a ni a, Libya hian heng thilah hian mawhphurtu-ah a inchhal duh lo na a, zangnadawmna pek hi a remti a ni. He zangnadawmna sumah hian dollar mtd. 300 chu October ni 9 khan pek a ni a, hmei hma lawk hian US Secretary of State, Condoleezza Rice chuan Tripoli tlawhin, hemi chungchang hi Libya hotute a sawipui a ni. Hemi hnu, Ningani khan Libya hian dollar mtd. 600 a pe leh a, a hnuhnung ber, dollar mtd. 600 dang chu nimin khan a pe fel ta a ni. Hetia Libya-in sum a pek tur a pek fel tak avang hian President Bush pawhin tuna thubuai la awmte nuai bona leh a kaihhnawih lehkha pawimawh dangte chu hming ziakin a nem nghet ve nghal a ni. Libya hian Lockerbie-a thlawhna tlaa thi chhungte chu dollar mtd. 8 theuh a lo pe tawh a, dollar mtd. 2 a la ba a ni.
————–

Pakistan ramah tukin khan richter scale-a 5-a na-in lir a nghing leh tih US Geological Survey-in a sawi a, he rama lirnghing rapthlak tak avanga mi 300 vel an thih atanga ni thumah a nghing leh ta a ni. He lir nghin lehna hmun hi Quetta-ah a ni a, thi leh hliam erawh chu an awm lo nia hriat a ni. Puan tawh angin, ni thum kal taa Pakistan lirnghing rapthlak tak hnuah khan na vak lovin vawi 250 vel a nghing leh tawh a, tunah hian chhawmdawlna hna thawktute chuan ruang leh ran thi tawih vel avangin Baluchistan bialah hri a leng tan niin an sawi a, heng laiah hian chhawmdawlna thil la dawng lo, riahna mumal pawh nei lovin mi tam tak an la awm a, hmeichhia leh naupang tam tak pawh sang tam tak hetiang hian an la awm a ni.
———-

Japan ram thlawhna sipai hotu lu, Gen Toshio Tamogami chuan Indopui 2-naah khan Japan ramin tu ram mah a run lo tih a sawi a, hei vang hian ban a ni dawn tih Japan defence minister, Yasukazu Hamada chuan a sawi. Minister chuan Gen Toshio Tamogami-a ngaihdan hi sorkar ngaihdan kalh a ni tih a sawi a, chuvangin a hna a chelh zui zel a rem tawh lo tih sawiin, thlawhna sipai hotu hi a ban nghal dawn tih a sawi a ni. Gen Toshio Tamogami-a thusawi hian an ram thenawm ram dangte a tihlungawi loh hle rin a ni a, China, North, South Korea leh Asia ram dangte pawhin Indopui laia Japan chet dan leh, mi ram a awp dante chu an la theihnghilh hauh lova, an rilru a la na hle nghe nghe a ni. Indopui hun laia a chet dan hi Japan hian kum 1995 khan pawi a tih thu a lo sawi tawh a, a hnu kum 10-ah thupha chawina thu a chhuah leh tawh bawk a ni. Hamada chuan an ram thlawhna sipai hotu thusawi hi, a nihna nen pawh a inrem lo hle tih a sawi. Kum 1941-ah khan Japan ramin Pearl Harbour a beih avangin America nen an indo a, khawvel indopui a chhuak a, Hamada erawh hi chuan khatih laia US President, Franklin D Roosevelt khan Japan ram chu indopuiah a hnuk lut zawk niin a sawi. Japan Prime Minister Taro Aso pawhin General thusawi hi a nihna nena ngaihtuah loh pawhin a dik lo hrim hrim tih a sawi.
————

Indonesia rama Bali thliarkara kum 2002-a bomb tipuak a, mi 202 thihna thlentu, Islam mi firfiak pathum chu tihhlum an nih dawn tawh avangin Indonesia ram pumah ven himna tihngawrh lehzual a ni a, khualzinte tlawh tam bik hmunte, tuialhthei hmunte pawh nimin atang khan ngun lehzuala ven a ni tih an ram Police thupuangtu, Abubakar Nataprawira chuan a sawi. Sorkar chuan heng mite hi ni rei lo te-ah kah hlum an ni tawh dawn tih a sawi a, tun thleng hian heng mi pathum – Imam Samudra, Amrozi Nurhasyim leh Ali Ghufron hian an thil tih rapthlak tak hi pawi tihna emaw, inchhirna emaw an neih loh thu an la sawi reng a, tihhlum an nih hunah an thianten phuba an laksak an beisei thu an la sawi reng zawk a ni.
—————-

Democratic Republic of Congo-a sorkar sipai leh hel hote indona avanga ral tlante chu an him zo ang em tih ngaihtuahna lian tak a awm mek a, UN refugee agency chuan ral tlan, mi sing 5 vel, refugee camp-ah pawh awm ngam tawh lote chu an thil neih laksak vek an nih bakah anmahni pawh an him zo lovang tih a hlauhthawn thu a sawi. Puan tawh angin, he indona hian mi tam tak, harsatna namen lo a thlen mek tih Red Cross-in a sawi a, he buaina tireh tura inbiakna hi buaipui chhoh mek ni mah se, a thenawm, Rwanda ram pawh a kang kai ang tih a hlauhawm hle a ni. France Foreign Minister Bernard Kouchner leh British Foreign Secretary, David Miliband chuan Congo buaina tihreh dan tur ngaihtuah hian Congo President, Joseph Kabila leh a thenawm, Rwanda President Paul Kagame an kawm thuai dawn a,   UN Secretary-General Ban Ki-moon pawhin Africa, Europe leh US hruaitute chu he buaina avanga mihring tawrhna leh hrehawmna zual zel thei tihreh dan, theihtawp chhuah turin a ngen a ni.
————

Vietnam rama tui lianah mi 24 an thi tawh a, Hanoi khawpuiah pawh mi engemawzat an thi tawh a ni. Tunlaia ruah sur hi Vietnam rama kum 20 chhunga ruahsur hnem ber a tling a, an thih tamna ber, Nghe An bialah chuan mi 11 an thi tawh a ni. Khawlaiah pawh tui lian hi awm thlenga dai ngai khawpin a tling a, September thla-ah pawh khan he ramah hian ruahsur, thlipui leh tuilian avangin mi 25 an lo thi tawh a ni.
—————