www.zonet.in

TUALCHHUNG CHANCHIN THAR

Mizoram Assembly inthlanna, December ni 2 a neih tur atan inbuatsaihna tluang takin a kal chho zel a, Chief Electoral Officer, Pu Lalmalsawma hova tun thla ni 27-a inbuatsaih dan tur sawiho a nih hnuah District hrang hrang DC, District Election Officer chelh kawptute chu mahni bial theuhvah an inbuatsaih zui a, vawiin khan Serchhip leh Lungleiah Bawrhsap hovin District Level Standing Committee an thukhawm a ni. Serchhipah chuan Bawrhsap, Pu H. Darzika, District Election Officer kaihhruaina hnuaiah Model Code of Conduct leh Election Commission thuchhuah pawimawh, Party hruaitute hriat tur te sem chhuah a ni a, inhrilhfiah ngaite inhrilhfiah a ni bawk. Serchhip District huam chhunga Assembly bial pathum-ah hian Polling Station 67 a awm a, chung zinga pahnih chu ven uluk ngai zual, sensitive polling station-ah dah an ni a, khaw pahnih, motora kal theih lohah te chuan inthlan buaipuitute chu ke-a an kal a ngai dawn a ni. Lunglei-ah pawh Bawrhsap, Pi M. Zohmingthangi, District Election Officer hovin District Level Standing Committee Meeting hi vawiin khan neih a ni a, hetah hian Model Code of Conduct inhrilhfiah a nih bakah tunhma lama thil an lo tawn tawh atangin tih tur leh tih loh turte sawifiah a ni a, AERO leh PWD Officer he inkhawma tel te chuan kawng awm dan an sawifiah a, inthlanna tluang taka neih a nih theih nan kawng siam that ngai laite pawh tarlan nghal a ni.

Lunglei District huam chhungah hian bial pasarih a awm a, Polling Station 164 awm zinga 8-te chu ven uluk ngai zual, sensitive Polling Station an ni a, ke-a kal ngai polling station 12 a awm bawk a ni. Lawngtlai District-ah pawh Bawrhsap, Pu Zahminga, District Election Officer hova ruahmanna siam chhoh mek a ni a, Motor leh thil dang mamawh turte chhut chhuah mek a ni a, Lawngtlai District-ah hian Assembly bial 3 a awm a, Polling station awm zawng zawng 145 zinga 6 chu ven uluk ngai zual, sensitive polling station an ni a, ke-a kal ngai polling station 39 an awm bawk a, Lawngtlai District hi ke-a kal ngai polling station ngah ber a ni. Saiha District-ah pawh District Election Officer, Pu V. Sapchhunga hova inbuatsaih chhoh mek a ni a, he District-a Assembly bial 2-ah hian polling station 66 a awm a, chung zinga 10-te chu ven uluk ngai zual, sensitive polling station a ni a, ke-a kal ngai polling station 2 a awm bawk a ni.
————

Tunlaia Aizawla sum dah punna sawi hlawh tak, ‘Chiahpuam’ an tih mai chu mi tam takin vawiin thleng khan an buaipui zui zel a, hetih lai hian an hotu lu ber, Pu H. Zomuanthanga, Laipuitlang, Aizawl-a mi chuan thuchhuah siamin mipuiin an duhthlanna ngeia sum an puktir chu an dawng ngei tih sawiin, Delhi-a a zin chhungin boruak sosang a thlen avanga a hlawma sum pek chhuah a ngai a, hemi avang hian  sum indaih lohna a thleng a, Bank lamin a beisei zat sum an pek chhuah theih loh avangin he buaina hi a thleng ta niin a sawi. He thilah hian mi rinawm lote avangin dik taka tituten an tuar phah ta niin a sawi bawk a, a hnena sum dah tute chu chiai lo tura ngenin, a kal dan pangngai angin kal reng a tum tih a sawi bawk. Pu H. Zomuanthanga chuan tuna an rulh hman loh te rul leh vek turin hun a ngai a, hun remchang tha tak, Mizoram sorkarin a pe tih sawiin mipui lam pawh amah chim buai lo turin a ngen a, anmahni sum dahna hmun theuha lo ngaichang turin a hrilh a ni. Delhi-a a kal chhan sawifiahin, Reserve Bank of India hnuaiah International Money Exchange Licence a dil niin a sawi a, hlawhtlinna kawl eng pawh a hmu niin a thuchhuahah chuan a sawi bawk.
————

MPCC President, Pu Lal Thanhawla chuan Mizoram mipute hian chhantu an ngai a, Mizoram mipuite hian MNF sorkar chu chhantu ni tlakah an ngaih loh avangin Congress mite chuan chhantu ni turin theihtawp an chhuah mek a ni a ti. He thu hi vawiina Congress Bhawan-a mithar lawmluhna inkhawma sawiin Pu Lal Thanhawla chuan mipuite thlamuantu ni turin an Party mite a fuih a ni. He inkhawma thusawitu dang, an Party senior Vice President, Pu R. Lalzirliana pawhin sorkar tha a piang dawn nia sawiin, Mizoramin tampui mitthi a tuar laia Central sorkar sum pek, cheng vaibelchhe tam tak, nuam tawl nana tichingpenah MNF sorkar a puh a, sorkar lu ber thlengin sum buaiin an buai nia sawiin, tunah hian chiahpuam buaiin sorkar a buai niin a sawi bawk…….. He inkhawm hi an Party Treasurer, Pu H. Liansailova’n a kaihruai a ni.
———-

Vawiin, Prime Minister hlui, Pi Indira Gandhi thih champha–ah khan Champhai Congress Office-a MPCC Driver Welfare Committee chuan Champhai Damdawi-Ina damlote tan thisen an pe. An thisen hi Blood Bank-a thawkten Champhai Dawr Venga Congress Office-ah an laksak a, hetah hian mi 33-in thisen an pe a ni.
———-

Thuampuia NREGS hnuaia inhlawhte zinga  mi 10 chu an kawng laih ko minin a chhilh a, vanneihthlak takin thi an awm lo. Bawngkawn Police Station atanga thu dawn danin, an kawng laih ko minin a chhilhte hi hnathawk dangten rang taka an hai chhuah theih avangin dama chhan chhuah an ni a, vawiin khan Greenwood Hospital-ah hruai nghal an ni a, thih hlauhawm an awm lo nia thu dawn a ni. Lei minin a nupui a chhilh tih hriaa lei minna hmun pana tlan, Pu David Lalrinenga chu hmanhmawh taka a tlan laia kawra a chetsual avangin a hliam bawk a, ani pawh hi damdawiinah dah a ni. An inhlawhna hi Zuangtuia Mandir thlang lama kawng laihnaah a ni.
———–

Serlui constituency huam chhunga YMM, Zoram Kuthnathawktu Pawl leh tlawmngai pawl dangte chuan Mizoram Assembly Inthlanna lo awm turah an candidate atan Pu Vanlalhmuaka, Vairengte khaw chhuak, tuna Aizawl Thuampui Venga awm chu an thlang. He thu hi Serlui constituency huam chhunga ZKP President, Pu Zaithanliana, Bilkhawthlira mi chuan a thawhpuite nen vawiin khan Aizawl Press Club-ah chanchinbu mite an hrilh a ni. An hruaitute chuan Serlui biala candidate turin an bial mi, anmahni hmakhaw ngai tur dah turin Political Party hrang hrang an ngen tih sawiin, an ngenna chuan ngaih pawimawh a hlawh loh avangin an bial tana mi tha ber tura an ngaih an chhawp chhuak ta niin an sawi a ni.
————-

SSA Mizoram Mission-a Committee sang, Executive Committee vawiina thukhawm chuan chak zawk leh mumal zawka  hnathawh dan tur an sawiho. He meeting, Principal Secretary, Pi. L. Tochhawng kaihhruaiah hian kum 2007-2008-a sum hman dan ziakna chu pharh a thlirho a ni bawk.
———–

Champhai District SP, Pu C. Lalthanmawia chuan Zotlang tlangval, Rickshaw Driver sawisak anga tun thla ni 27-a Champhai chanchinbu thenkhata tarlan chu an chhui hnuah thu dik lo, phuahchawp a ni tih an finfiah a, hemi chungchanga Champhai SP thuchhuah tarlan danin, Lalrinfela hian a pawisa hlawh zawng zawng leh a pawisa ken, inlehkha dennaa a khawhral vek hnuah thudik lo phuah chawpin Champhai Police-ah FIR a thehlut a, hemi avang hian Police-te chuan amah ni an hreng nghal niin a sawi a ni.
————-

Youth Hostels Association of India (YHAI) buatsaiha National Trekking and Caving Expedition naktuk atanga tan tur atan Training vawiin khan  Sports Directorate Office-ah neih a ni. He Training-ah hian First Aid inpek dan te leh thil tul dang inzirtir a ni a, hetah hian YHAI National Executive Secretary, New Delhi atanga lokal, Pu KS Chauhan pawh a tel a ni. He Trekking Programme-ah hian State dang atang lokal mi 300 vel leh Mizoram atanga chhuak tur mi 200 vel an tel dawn a ni.
———–

Aizawl Civil Hospital atanga chhuak Medical Team chuan nimin khan Mualmam-ah Free Clinic an nei a, hetah hian damlo 91 enin damdawi an pe nghal a ni. National Rural Health Mission tihhlawhtling tura he Free Clinic neihah hian CTI Sesawng leh Sesawng khua atang pawhin Damlo engemaw zat an inentir a ni. November ni 6 leh ni 7 khian Phullenah Free Clinic neih leh a ni ang.
———–

Aizawl District SP hnuaia Police Officer leh Aizawl District-a Police Station leh Outpost-a OC zawng zawngte tan vawiin khan SP Office Conference Hall-ah Election Duty leh Code of Conduct chungchang training neih a ni. He Training hi Aizawl SP, Pu Zorammuana’n a kaihruai a, Election Officer, Pu H.Lianzela’n inthlan buatsaihnaa Police Officer-te tih turte, Code of Conduct-in a huam chinte, Vote chhiarna hmun-a kal phal chinte leh inthlan huna Police-te hriat tur tul hrang hrangte a zirtir a, hei bakah hian inthlan hmasa lam atanga tawn hriat chi hrang hrangte sawiin Election Observer-in phal chin a bithliahte zirin an sawiho a ni.
———–

Vawiin vek khan Aizawl District SP Pu Zorammuana hovin SP Office Conference Hall-ah pawi khawihna thlen dan thlir hona, Crime Review meeting neih a ni a, hetah hian tun thla chhunga Aizawl District-a sualna hrang hrang thlir hi a ni. Aizawl SP chuan tun thla chhunga Aizawl District-a sualna hrang hrang thlen dan enin, Police-tentan lak a ngaih thu a sawi a, Police Station leh Outpost-a FIR lut bawhzui chungchangah ngawrh lehzuala tan lak a tul thute, Police-te chu inthlahdah lova misual hnu chhuina kawngah tan lak deuh deuh a tul thu leh insiam that an tulna laiah insiam that a pawimawh thu a sawi a ni. Meeting-ah hian SP, Addl SP pahnih, Aizawl North leh South SDPO, Sakawrdai SDPO leh Police Station OC leh Outpost OC-te a tel a ni.
————

Health Department buatsaihin MHIP Gen. Hqrs member-ten vawiin khan MHIP Conference Hall-ah PC & PNDT Act, 1994 chungchang an zir ho. He hun hi MHIP President, Pi Rozami’n a kaihruai a, Dr. T.Lalzoliana, Dr. T.Lalhmangaihi leh Dr. Catherine Ngurbiakveli-te’n he dan chungchang hi sawiin, India ramah nu nau pai, hmeichhia a nih chuan pasal an neih huna thuam chhawm hautak tur ngaihtuaha tihtlak a hluar thu te, nau pai, mipa nge hmeichhia tih, Ultra-Sound hmanga tih en phal a nih loh thute, a hremna dan leh lei chawi theih a nih thute an sawi a ni.
———–

Mizoram Council of Science & Technology leh Mizoram Science Society tangkawp buatsaihin vawiin khan I&PR Auditorium-ah zirlaite tan faina leh thianghlimna chungchang inzirtirna hun hman a ni. He inzirtirna hi hun hnih-ah then a ni a, chawhma lam chu Mizoram Science Society President Pu Dunglena’n a kaihruai a, RIPANS Lecturer, Dr. Vanlalruata leh PHE SE, Pu C.Lallunghnema-te’n tui-a natna awm leh in chhung leh a vel vawnfai dan leh bawlhhlawh then fai dan an sawi a, chawhnu lamah Govt. Zirtiri Residential Science Lecturer, Pi Lalsangkimi Hmar thuziah, ei tur tihthianghlim leh mimal invawn fai chungchang zir a ni. He hunah hian Higher Secondary School 8 atangin zirlaite an tel a ni.
———–

Mizoram Mathematics Society-in tun thla ni 2-a Middle School leh High School zirlaite tana Mathematics Competition a buatsaih result chu vawiin khan Vanapa Hall-ah puan a ni a, School Education Director, Pi Malsawmthangi’n a hmanpui a ni. He hun hi MMS President Dr. LN Tluanga’n a kaihruai a, Pi Malsawmthangi chuan Mathematics thiam tur chuan thluak fim pu tura ruih theih thil tih loh a tul thu sawiin, tunlaia zirlaite chu khawvel thiamna hrang hrangin a chhe zawnga a nghawng avangin fimkhur turin a chah a ni. He Competition-ah hian High School-ah chuan 1-na atanga 3-na chu St. Paul’s Higher Secondary School zirlai, PB Lalnunsanga, Bernadette Lalbiaknungi leh Zothanzuala an ni a, English Medium Middle School-ah 1-na leh 2-na chu Mary Mount School zirlai, Lalrinsanga leh Debasmita an ni a, 3-na chu Lalrintluanga Sailo, Lalmalsawma Memorial School zirlai a ni a, Mizo Medium Middle School-ah Lalmuanpuii Varte, PC Girls School chu 1-na a ni a, 2-na leh 3-na chu Mission Vengthlang Middle School zirlai Lalbiakzama leh Lalrintluanga an ni.
———–

SP CID Crime hnuaia Special Narcotic Police Station Staff-ten vawiin khan Bungkawn Vengthar-ah Proxyvon mum 295 an man a, a neitu, Sonai Begum pawh manin thubuai an siamsak a ni. Special Narcotic Staff-te man, proxyvon hi tualchhung rate-in cheng 14,750 man a ni.
———–

Govt. JL Higher Secondary School NSS Unit-in vawiin khan Aizawl Civil Hospital-a damlote tan thisen Unit 77 an pe a, thisen pe-te hi mipa 68 leh hmeichhia 9 an ni a, an thisente hi Civil Hospital Blood Bank-a thawkte’n an School-ah an la a ni.
————

Hmarchhak huap-a Chhandamna Sipai Pawl |halai inkhawmpui, Territorial Salvation Army Youth Congress chu zanin hian Chaltlang Field-a pandal-ah tan a ni a, he inkhawmpui-ah hian Hmarchhak state hrang hrang atangin palai sang chuang an lo tel a ni. he Congress thupui hi “Intithianghlim rawh” tih a ni a, a tan zan hi palai lawmna programme atan hman a ni a, Eastern Territory Chief Secretary, Lt. Col. Lalngaihawmi’n Pathian thuchah a sawi ang. He inkhawmpui-ah hian rorel bakah Bible Study, Pathian Fakna inkhawm,  Mission Night bakah thianghlimna inkhawmte neih a ni ang a, Pathianni zan thleng a awh ang.
————

Mizoram University hnuaia College hrang hrangte intihhlimna, Mizoram University Sports vawi 7-na chu vawiin khan Ramhlun Sports Complex-ah University Vice Chancellor, Prof AN Rai-a’n a khar a, he Sport-a 1-na, Govt. Hrangbana College chuan Gold Medal 18 an la a ni. Puan tawh angin MZU Sports-ah hian Aizawl khawpui chhunga College-te bakah Lunglei Govt. College, J Buana College leh Kolasib College an tel a, infiamna hrang hrang 9-ah inel a ni. Football leh Athletics chu Ramhlun Sports Complex-ah khelh a ni a, Basketball chu Zarkawt Recreation Center-ah, Volleyball leh Chess chu Pachhunga University College Campus-ah, Badminton leh Table Tennis chu Kulikawn Indoor Stadium-a khelh a ni a, Boxing leh Judo chu Mission Vengthlang-a SAI Center-ah khelh a ni a, vawiin-a a kharna neih hma-in Football final khelh a ni a, hetah hian Pachhunga University College-in si hnih faiin Govt. Hrangbana College an hneh a ni. He Sports-ah hian Hrangbana College hian Gold medal 18, Silver 8 leh Bronze medal 10 an la a, 2-na, Govt. Aizawl College-in Gold 9, Silver 8 leh Bronze Medal 7, Pachhunga Univ. College-in Gold Medal 4, Silver 9 leh Bronze Medal 10 an la bawk a, Vice Chancellor hian medal leh Champion lawmman a hlan a ni……………….
———–

Vawiin khan Aizawl khawpui chu a lum lai berin celsius degree 21.3 a ni a, a vawh lai berin degree 17.4 a ni. Hemi chhung hian ruah a sur lo a ni.
———-