www.zonet.in

RAM CHHUNG CHANCHIN THAR

Nimina Guwahati-a bomb engemawzat tipuaktu chu hriat la ni chiah lo mah se, Intelligence lam mite chuan Muslim mi firfiak pawl an ringhlel deuh ber nia hriat a ni a, an rinhlelh zual chu Harkat-ul-Jehadi-e-Islami (HuJI) nia sawi a ni. Heng Muslim mi firfiak pawlte hian hmar chhak bial hmun hrang hrangah awm hmun khuarin, pawi an khawih tam telh telh dawn niin thil awm dan thlirtute chuan an sawi a, Intelligence Officer pakhat chuan, heng mite hian hmun hrang hrangah thurualpui an nei a, Tripura-ah pawh All Tripura Tiger Force an thurualpui a, Assam-a bomb tihpuahna-ah pawh hian ULFA an thurualpui a nih a rinawm tih a sawi. Assam Police te pawhin ULFA hi hming hmerhin an rinhlelh thu an la sawi lo a, HuJI erawh chu an ringhlel hle nia hriat a ni. State CM, Tarun Gogoi-a pawhin state sorkarin report a dawn dan chuan, ULFA leh indona thianghlim puangtute inthurualin pawi khawih an tum niin a lang tih a sawi. Kolkata-a sipai officer pakhat sawi dan chuan, Guwahati-a bomb puak hi Assam chuan hnuai lama awm, ULFA Battalion 709-na ten HuJI-B nena inthuruala an tih a nih a rinawm tih a sawi. ULFA chuan he thilah hian an inhnamhnawih lo niin an sawi a, an pawl hotu pakhat, Anjan Barthakur-a chuan, Guwahati-ah thuchhuah siamin, he thil thleng tuartute chu an tawrhpui thu a sawi a, Udalpuri-a Rowta khuaa hmeichhe pakhat pawngsual nia sawi chungchang, mipuiin an ngaihven avanga titi dang siam nan leh, mipui rilru hruai kawi nan sipaiten bomb hi an tipuak ni hiala a rin thu a sawi.

Intelligence lam hotute chuan hel pawl pathum, Bangaldesh-a awm hmun khuar vek, ULFA, KLO leh ATTF te hian sorkar an do vek a, kum 2000 hnu lamah HuJI-B nen hian an inkungkai tan a, ULFA phei hi chuan Assam-a Muslim mi firfiak pawl thenkhat an be pawp reng niin an sawi a, an zinga pakhat, Muslim United Liberation Front of Asom chu Bangladesh atanga ralthuam chaw luttu a ni a, HuJI-B hian Manipur-a PREPAK an kawmngeih bakah PLA leh UNLF pawh dawr an tum mek nia hriat a nih thu a sawi bawk. Nimina Guwahati-a hmun hrang hranga bomb puaka thi zat hi chiang chiah thei rih lo mah se, 77 vel nia ngaih an ni a, tualchhung mite erawh chuan za aiin an tlem thei lo niin an sawi thung a, hliam tam tak an awm bawk. Nimina thil thleng, khawpui pali-a bomb vawi kaw puak avang hian mipuite an chi-aiin an la thlabar hle a, vawiin phei kha chuan hna pawh an thawk hlei thei hlawm lo niin Guwahati atanga ZONET thu dawn chuan a sawi.
———

Orissa-a Kristianten tihduhdahna an tawrh nasatna, Kandhmal biala rawngbawltu, hmeichhe pakhat pawngsual nia sawi chungchangah ASI pakhat telin police 5 chu an hna ngaihthaha puhin chawlhtir an ni a, he rawngbawltu hian, tawhsual a tawh lai hian heng police te hian an tanpui duh lo nia a sawi avangin inthlahdah leh mahni hna thawk tha lovah ngaih an ni. He rawngbawltu, hmeichhe chunga thil thleng avang hian Orissa Chief Minister Naveen Patnaik chuan Police hotu liante chu he thil thlen laia a hmuna Police duty te hre chiang vek turin a lo hrilh tawh a, Police ten an chhan duh lo tih he rawngbawltu-in a sawi chu CM hian a ngai pawimawh hle a ni. He rawngbawltu hian, amah pawngsualtute chu Police duty te nen hian an inkawmngeih hmel hle tih thuthar lakhawmtute a lo hrilh tawh nghe nghe a ni.
————-

Maharashtra-a hmar lam mite ngai thei lotu pawl lian tak, Maharashtra Navnirman Sena hotupa, Raj Thackeray chuan thuthar lakhawmtute hnena engmah sawi lo tura court-in thu a pek bawhchhiain, Mumbai-ah thuthar lakhawmtute a kawm a, Chhat Puja huatna a neih loh thu sawiin, politics thila lak chi pawh a nih loh thu a sawi a ni. Bihar tlangval pakhat, tun hnaia Mumbai tualchhung rela tihhlum a nih chungchang sawiin Raj Thackeray-a chuan, Marathi tlangval, pawn lam miten an beih pawhin tu lakah mah hremna lek a ni bik lo, a ti a, Mumbai Police ten Bihar tlangval pakhat, Rahul Raj, tun hnaia an kap hlum pawh, Rahul Raj-a hian bus chhung atanga pawn lama mite silaia a tin miau avangin Police te hian an tih tur dik tak an ti niin a sawi.MNS hian ram chhung hmar lam mi, Mumbai-a awmte an ngaih theih loh avang leh, an lakah tharum hial an thawh thin avangin he pawl hrem tura sorkar nawrna hi a nasa sawt hle a, Thawhlehni pawh khan Mumbai khawpui pawna rel pakhatah tlangval pakhat, hmar lam mi chu thi-a chhar a ni.
———-

President Pratibha Patil leh UPA Chairman, Sonia Gandhi hnena vauna, e-mail-a thawntu nia sawi, tlangval pakhat chu thu zawh fiah mek a ni a, Police te sawi danin, he e-mail hi Palarivattom bula Reliance web atanga thawn a ni a, he thilah hian thu an zawh fiah mek tih loh hi chu Police-ten man an la nei lo a ni.
————

Kum 30 kal taa Bihara tualthata puh a nih avanga man, tun thlenga la hren chu chhuah nghal turin Supreme Court-in thupek a chhuah a, a pawi khawih nia sawi hi finfiahna emaw, mita hmutute thusawi emaw engmah a awm theih loh avangin court sang ber chuan he thupek hi a siam ta a ni. He pawi khawihtu nia puh, Kirandeo Prasad hi Sessions Court chuan dam chhung tang turin a lo ti tawh a, mahse Patna High Court chuan hei hi a hnawl a, High Court ngaihdan hi Supreme Court chuan nemnghetin, Kirandeo Prasad chhuahna tur thupek hi a siam ta a ni. Kum 1978 March ni 25 khan he tualthahna hi a thleng a, Kirandeo Prasad leh a thiante hian mi pakhat, Sukhu Mahton an tih chu an that nia sawi a ni a, mahse kum 30 liam hnuah pawh an puhna-ah hian finfiahna tha tawk a awm thei ta si lo a ni.
———-

Tamil Nadu sorkar chuan state CM hlui, Pi Jayalalitha chu dan phal chinah ven himna tha tawk pek a ni ang tih Madras High Court a hrilh a, Jayalalitha hi LTTE eptu-a ngaiin an lam tang pawl pakhatin nimin khan an vau a, hei vang hian Jayalalitha hian ven himna tha tawk pe tura sorkar hrilh turin court hi a ngen a ni. He ngenna chungchangah hian state sorkar aiawha ding, Advocate General, G Masilamani chuan he thu hi Justice M Jaichandren a hrilh a, khua leh tuite ven him chu state sorkar mawh a ni tih sawiin, Jayalalitha pawh hi dan ding lai hnuaiah ven himna pek theih ang chu pek a tiam a ni.
———–

Union Cabinet chuan  hun rei tak inchiah tawh, Education Bill chu a pawm ta a, hemi hnuaiah hian ram chhunga naupang, kum 6 leh kum 14 inkarte chu zirna, a thlawna pek an ni ang a, zirna hi naupang zawng zawng pek tur a ni bawk. Finance Minister, P.Chidambaram-a chuan he bill hi Minister engemawzat telna Committee hi vawi tam tak a thlir hnuah Ningani zan khan Union Cabinet-in a pawm ta tih a sawi a, he dan hi hman a nih hunah chuan state leh sorkar laipuiin ram chhunga naupang, hetiang rualte hi zirna, a thlawnin, a bo a bang awm lovin a pe ngei tur a ni dawn a ni tih a sawi. Minister chuan state thenkhatah Assembly inthlan puan a nih tawh avangin, he dan chungchang hi Election Commission sawipui a nih hnuah HRD Ministry-in a tichhuak dawn tih a sawi bawk.
———–