Assembly Inquiry Committee-in Pu Lalsawta leh Dr. R. Lalthangliana te chu tun thla ni 28 hma-in an lehkha pawimawh neihte, Committee-a thehlut turin a hriattir. House Inquiry Committee member pakhat-in kan Corr. a hrilh danin, an thil chhui tur ber chu SSA sum lapse leh lapse loh bakah Dr. R. Lalthangliana’n Press Conference a neih tuma thuthar la khawmtute a pek, a lehkha chu a phuahchawp a nih leh nih loh a nih avangin Education Minister, Pu Lalsawta leh Dr. R. Lalthangliana chu tun thla ni 28 hma-in an lehkha neih ang angte Committee-a thehluh turin an ti a, hei bakah hian Education Department leh SSA te pawh ni 28 hma hian lehkha pawimawhte thehlut turin an hrilh bawk niin a sawi. House Inquiry Committee member chuan, he Committee hi tun thla ni 30 hian an thu khawm leh dawn niin a sawi a, thil dik tak hmuh chhuah tumin theihtawp chhuah an tum niin a sawi. Political Party pakhatin House Inquiry Committee chhui tur chu Dr. R. Lalthangliana lehkha, a lem a nih leh nih loh ni-a an sawi chu a dik famkim lo tih sawiin House Inquiry Committee member pakhat chuan, Dr. R. Lalthangliana lehkha dik leh dik loh chu chhui ngei dawn mah se, SSA sum lapse leh lapse loh pawh an chhui dawn tih a sawi. Puan tawh angin, SSA sum lapse leh lapse loh chhui tur hian Speaker, Pu R. Romawia chuan House Inquiry Committee a din a, mahse member pakhat, Pu John Siamkunga erawh chu a bang a, Committee-te hi vawi hnih an thu khawm tawh a ni.
RAM CHHUNG CHANCHIN THAR
J&K khawpui, Srinagar-a sawrkar damdawi in pakhat, GB Pant Hospital-ah tun hnai chawlhkar 2 chhunga naupang 35 an thih tawh avangin mipuiin lungawi lohna an lantir. He damdawi inaa thil thleng duh lohna lantira pun khawm huaihawttute zinga mi, Independent MLA, Engineer Rasheed chuan damdawi ina naupang tam takin nunna an chan chhan hi sawrkar inthlahdah vang niin a sawi a, he damdawi inah hian damlo-te mamawh atana hman tur, Ambulance pawh a awm loh bakah naupang damlo na zual enkawlna, ventilator pawh a awm lo nia sawiin, hetianga sawrkar damdawi ina thil fel lo tak tak a awm avang hian FIR pawh a thehlut dawn niin a sawi a, CM pawh he thilah hian inrawlh se an duh thu a sawi a ni. He sorkar damdawi ina naupang-te chunga thil thleng avanga lungawi lo an punkhawm hnu hian state sawrkar chuan he damdawi ina naupangte thih chhan hi chhui a nih tur thu a puang a ni. State Medical Education Minister, RS Chib-a chuan he damdawi in hi nimin khan a tlawh a, chawlhkar hnih kal ta chhung khan naupang 35 an thi tih chu thu dik a nih thu leh, January ni 1 atang phei kha chuan naupang 358 an thih tawh thu a sawi. He thil thleng chhuitu tur hi Sher-e-Kashmir Institute of Medical Sciences Soura Director, Showkat Ali Zargar-a’n a ho ang a, chawlhkar khat chhungin report an thehlut ang.
RAM PAWN CHANCHIN THAR
China sorkar dodaltu, Chen Guangcheng chu ram danga a kal theih nan sawrkarin ni 15 chhungin Passport a pe dawn. Chen Guangcheng hi sawrkar thil tih dik loh nia a ngaihte a puan thin avangin kum 4 chhung tantir a nih hnuah kum 2010 atang khan pawn chhuak thei lo-in a inah hren a ni a, mitdel mah ni se, a chenna in atang hian tlan chhuakin Beijing-a US embassy-ah ni 6 a tawm bo a, damdawi ina a inentirna-ah police-ten an veng leh a, tun thleng hian damdawi inah hian a la awm a ni. China sawrkar chuan lehkha zir tura ram dang a pan a phalsak thu a puan hnuah nimin khan a chhungte nena US-a an awm lailawk theihna turin Passport an dil a, a dilnaa tihfel ngaite chu BBC miten an buaipui a, sawrkar hotute chuan Chen-a leh a chhungte hi ni 15 chhungin Passport an pek tur thu an sawi a ni. Chen hian New York University-ah dan a zir dawn nia sawi a ni a, America sawrkar pawhin a chhungte nena US-a an chen theih nan an visa pek a remti tawh a, a nupui leh a fanu 2-te nen US-ah hian an awm thei dawn a ni. Chen hian a chenna in atanga a tlan chhuah tum khan a ke a tina a, a hriselna dang chu a tha niin amah enkawltute chuan an sawi na a, a ke na avang hian a la kal hlei thei lo niin an sawi.
ZONET TODAY
Mizoram State Skill Development Mission agreed to constitute State Skill Development Board to be headed by the Chief Secretary. This decision was taken at the State Skill Development Mission Meeting held in the Cabinet Room today under the Chairmanship of the Chief Minister, Mr. Lal Thanhawla. The State Skill Development Board is to function in line with the National Skill Development Mission to implement the National Policy of creating employment opportunities for 500 million educated youths during 12th Plan period. The meeting was attended among others by the Labour & Employment Minister, Mr. Lalrinliana Sailo, the Education Minister, Mr. Lalsawta, the Social Welfare Minister of State, Mr. P.C.Lalthanliana, the Chief Secretary, Mr. Van Hela Pachuau and other senior officers.
Loading ...